Immami itisuumi aatsitassarsiorneq nunat tamalaat akornanni avissaartuuffiusoq

- Immami itisuumi aatsitassarsiornerup qanoq sunniuteqarsinnaanerata paasinissaata tungaanut, taamatut suliniuteqarneq nunarsuaq tamakkerlugu unitsikkallarneqarnissaa sorsuutigaarput.

Finlandimiu avatangiisinik illersuiniaqatigiiffimmi Seas At Riskimi siunnersorti Simon Holmström oqarpoq.

Illersuiniaqatigiiffik Bruxellesimi qullersaqarfeqartoq Europami peqatigiiffiit 35-nit amerlanerusut immap illersornissaanik anguniagaqartunik ilaasortaqarpoq.

Avatangiisinik illersuiniaqatigiiffiup Naalagaaffiit Peqatigiit nunani tamalaani immap naqqanik nakkutilliisoqarfiata ISA-p (International Seabed Authority) suliai malinnaaffigisarpai, 1994-imi imarsiornermut inatsisit pillugit isumaqatigiissutip ataani immikkut ittumik isumaqatigiissuteqarluni pilersinneqarnikuulluni. Aammattaaq avatangiisinik illersuiniaqatigiiffiup EU-p aatsitassanut politikkia aatsitassarsiornermilu ineriartorneq malinnaavigilluarpai.

Sinnaakkutit suli aalajangerneqanngitsut

Simon Holmström naapertorlugu ISA-p immap naqqani saffiugassanik piiaanissamut tunngatillugu suli aalajangersagaq pisussaaffiliisoq akuersissutiginikuunngilaa.

- Isumaqatiginninniarneq sivisuvoq, pingaartumik nunanit, ilisimatusartunit avatangiisinillu illersuiniaqatigiiffinnit akimmiffissalersuineq pissutigalugu. Taakku nunarsuarmi pinngortitap ataqatigiinnerata navianarnerpaartaasa ilaanni aatsitassarsiorfissuarmik nutaamik aallartitsinissamut ilisimasat killeqarnerat pissutigalugu taamaaliorput.

Taamaattumik sinaakkutissat inissinneqanngippata aningaasarsiutiginiarlugu aatsitassarsiornissamut tunniussisoqarsinnaanngilaq. Simon Holmström naapertorlugu nunarsuaq tamakkerlugu 30-t aatsitassanik ujaasinissamut akuersissuteqarput. Aammattaaq naalagaaffiit suliffeqarfiillu akuersissutinik pissarsiniarsaralutik allatigut periarfissarsiorput, ilaatigut nunap inatsisai aqqutigalugit, soorlu Norgemi.

The Metals Company 

The Metals Company,Vancouverimiittoq, Australiamiumillu Gerard Barronimik siuttuuffigineqartoq, ingerlatseqatigiiffiit immami itisuumi aatsitassarsiorniarlutik ilungersortut ilagaat.

Ingerlatseqatigiiffiup Clarion-Clippertonimi Manerassuarmiittumi saffiugassanik qalluineq sivisuumik tapersersorsimavaa. Nunanut allanut ministeriusimasoq Jeppe Kofod suliffeqarfiup soqutigisaanut sunniiniartut 2023-mi ilagaat. TaannaAustraliamiut aatsitassarsiornermik ingerlatseqatigiiffianni Energy Transition Mineralsimi, Kujataani Kuannersuarni ujaasinissamut akuersissutaateqartumi, maanna siunnersortaasoq.

USA-p præsidentianut attaveqaatit 

The Metals Company naapertorlugu immami itisuumi aatsitassarsiorneq nunami piiaanermut taarsiullugu nungusaataanngitsumik aatsitassarsiorneruvoq, aatsitassarsiorfillu immami itisuumi aatsitassarsiornermi avatangiisinut navianaatit annikillisarsimaneri pillugit ilisimatusartunit avatangiisinillu illersuiniaqatigiiffinnit arlaleriarluni isornartorsiorneqartarpoq.

- The Metals Company sunniiniarnermik suliaqartorujussuuvoq. Aamma USA-mut qanimut attaveqarput. Præsident Donald Trumpip USA-p nunat tamalaat imartaanni USA-llu imartaani immami itisuumi aatsitassarsiorfiit aallartinnissai kissaatigalugu apriilimi nalunaarutigaa. Siullermulli tunngatillugu USA imarsiornermut peqqussutit pillugit isumaqatigiissummut atsioqataanikuunngikkaluarpalluunniit nunat tamalaat akornanni maleruagassanut naapertuutinngilaq. The Metals Company Manerassuarmi immami itisuumi saffiugassanik ujaasinissamut akuersissut qinnutigaa, USA-milu oqartussaasut isumalluarput. 2027-mi aallartissasoq pilersaarutaavoq, Simon Holmström oqarpoq. Taanna qallunaat nunanut allanut ministererisimasaata The Metals Company sullillugu sunniiniarnera ”nunani arlalinni politikeriusimasut aatsitassarsiornermik nukissiuutinillu ingerlatseqatigiiffinnit suliniutinik politikkikkut tapersersorneqaruminaatsussanik ammaassiartorlutillu akuersissuteqartitsiniarneranni ilaasoq“ isumaqarpoq.

Jeppe Kofodip akulerusimanera 

Nunanut allanut ministeriusimasoq Jeppe Kofod The Metals Company sinnerlugu suli sunniiniartarnersoq aamma immami itisuumi aatsitassarsiorneq Kalaallit Nunaanni ineriartortinneqarsinnaanersoq Sermitsiap siusinnerusukkut aperaa.

The Metals Companymik siunnersortitut suleqatiginninnini ”ukiut marluk sinnerlugit matuma siornatigut“ unitsissimallugu, tamannalu ”Kalaallit Nunaannut attuumassuteqanngitsoq“ Jeppe Kofod akissutigaa. Aamma ”Kalaallit Nunaanni qanoq pisoqassanersoq kalaallit politikeriinit oqartussaasunillu aalajangiiffigineqassasoq“.

Nunat 40-t immami itisuumi aatsitassarsiornerup unitsikkallarneqarnissaa imaluunniit pinaveersaartitsinertut unitsinneqarnissaa maannakkut tapersersorpaat. ISA-p maleruagassat pillugit isumaqatigiinniarnerit 2026-mut marsip tungaanut ingerlatissavai.