Kangerlussuarmi silassorissuusianut datacenteriliornissaq inuussutissarsiornermut naalakkersuisoqarfiup ilisimanngikkaa

Kalaallit suliffeqarfiutaat Inuit Development Company inuussutissarsiortumit Svend Hardenbergimit siuttuuffigineqartoq Amerikamiut suliffeqarfiutaannik AmForge Corporationimik pisortaanillu Dan Whaleymik suleqateqarnissamut isumaqatigiissuteqarsimavoq.

Suliniut erngup nukinganik nukissiorfiliornissamik, qarasaasianut atortorissaarutinik sanaartornermik Kangerlussuarmilu immap naqqatigut kabeliliornermik imaqarpoq.

Tamanna Svend Hardenbergip tusagassiuutinut nalunaarutaani atuarneqarsinnaavoq.

Drew Horn aqutsisoqatigiinni ilaavoq

Nittartakkami amforge.com-imi allassimavoq Dan Whaleyp saniatigut aamma Neil Cohn aamma Drew Horn Amerikami suliffeqarfimmi tamatumani ilaasortaasut.

AAMMA ATUARUK

Svend Hardenbergip suleqatini Amerikamiu saqqummiuppaa

Drew Horn aamma ingerlatseqatigiiffimmi GreenMet-imi, ukiup ataatsip ingerlanerani Amerikamiut Kalaallit Nunaanni aningaasaliisinnaanerannik misissuisimasumi, pisortaavoq. Drew Horn aamma Tanbreezip, Kujataani Killavaat Alannguanni piiaanissamut akuersissummik piginnittup, suleqatigilernissaa sulissutigisimavaa.

Drew Horn siornatigut Det Hvide Husimi aamma USA-p nukissiornermut ministeriaqarfiani illersornissamullu ministereqarfiani qaffasissumik atorfeqarsimavoq, 2021-milu GreenMet pilersinnagu.Suliffeqarfik Libra Groupimik suleqateqarpoq, taanna Lomar Shippingimit aallaaveqarpoq, nunanilu 60-ini silaannakkut angallassinermi, nukissiornermi, imaatigut kiffartuussinermi, illunik allanillu suliaqartuuvoq.

Naalakkersuisoqarfik suliniut pillugu ilisimasaqanngillat

Inuussutissarsiornermut, Aatsitassanut, Nukissiuuteqarnermut, Inatsisinut Naligiissitaanermullu Naalakkersuisoqarfiup Hardenbergip Amforgellu Kangerlussuarmi erngup nukinganik aamma qarasaasianut atortorissaarutinik centeriliornissamik suliniutaat ilisimanngilaa.

– Tusagassiuutitigut taamaallaat tusarnikuuarput, KNR-illu allaaserisaani eqqaaneqartoq Svend Hardenbergimik siorna ataatsimeeqateqarnera datacenterissamik suliniummut tunngassuteqarsimanngilaq, Inuussutissarsiornermut, Aatsitassanut, Nukissiornermut, Inatsisinut Naligiissitaanermullu Naalakkersuisoq Naaja H. Nathanielsen Sermitsiamut oqarpoq nangillunilu:

Erngup nukinganik nukissiorfiit ukioq manna neqeroorutigineqartut

Naaja H. Nathanielsen isumaqarpoq Hardenbergip erngup nukinganik nukissiorfiit pillugit suliniutaa, Inatsisartut ukioq manna unammilleqatigiinnermut ammaassimasaa, atornissaannut tunngassuteqartoq.

– Erngup nukinganik nukissiorfiit kommunimut pilersaarutini Namminersorlutillu Oqartussani immikkut immikkoortinneqarsimapput, taamaattumik allanit atorneqarsinnaanatik.  Pilersaarut naapertorlugu piukkunnarsaasoqassaaq — tassa suliffeqarfiit sorliit neqerooruteqarsinnaanersut toqqaasoqassaaq — 2026-p qiteqqunneraniit 2027-p aallartinneranut.

- Taava suliffeqarfiit piukkunnarsakkat ukiualuit (ukiuni arlalinni) sumiiffimmi misissuinissaminnut piffissaqartussaapput suliassamik neqerooruteqarnissaminnnut paasissutissanik aallerfissatut. Suliap tamakkiisumik 2028-mi naammassinissaa naatsorsuutigaarput.

Erngup nukinganik nukissiorfiit, innaallagissamillu atuineq

Ingerlatseqatigiiffik Namminersorlutik Oqartussat neqeroortitsineranni ajugaasoq atuinissamik akuersissutinik tunineqartarpoq, taakkualu tunngavigalugit periarfissanik aalajangersimasunik atuisinnaalertarpoq. Tassa ingerlatseqatigiiffiup ajugaasup erngup nukinganik nukissiorfiliornissaq kisiat suliarissanngilaa, aammattaarli nukissaq pinngortinneqartoq qanoq atorneqarnissaa aalajangersinnaavaa. Tamanna taaguuteqarpoq "off-take project“ (nukimmik tigusisoq).  Maannakkut neqerooruteqartup aalajangersinnaavaa nukik qarasaasianut atortorissaaruteqarfimmut, innaallagissiorfimmut allamulluunniit atussanerlugu.

– Namminersorlutik Oqartussanut pingaaruteqarpoq inuiaqatigiit suliniummit tamarmiusumit naleqquttumik pissarsinissaat, taamaattumillu tamanna neqeroorutigineqartumi soorunami aamma ersersinneqassaaq. Neqeroorutigineqartumi nalilersuinermut tunngavissat arlallit aalajangersarneqarsimapput, taamaalillutik ingerlatseqatigiiffiit naligiimmik unammillersinnaapput. Najoqqutassiaqarnermi siunertaavoq qulakkeerneqassasoq suliniut Kalaallit Nunaannut nalitunerpaasoq toqqarneqassasoq, Naaja H. Nathanielsen oqarpoq.

Sivisuumik utaqqineq aaqqiissutissaqarnanilu

Suliniuteqarnissamulli neqerooruteqartitsineq 2028-mi naammassineqareerpat ajugaasullu toqqarneqareeraluarpalluunniit, piffissaq sivisooq ingerlareerpat misissuinerit suli annertunerulissapput ajugaasumullu pilersaarusiorneq sukumiinerulerluni, Naalakkersuisoqarfik ilisimatitsivoq.

Piffissami tamatumani ilaatigut nunaminertamik qinnuteqartoqassaaq aamma VVM-imik nalunaarusiortoqassaaq, tassani suliniut avatangiisinut qanoq sunniuteqassanersoq allaatigineqarluni.

Naalakkersuisoqarfik ilisimatitsivoq ingerlatseqatigiiffik suliniummut atatillugu immap naqqatigut kabelinik ikkussuisariaqarpat, immap naqqanik misissuinissamut ataani inissisimasumut Geodatastyrelsenimut, Søfartsstyrelsip ataaniittumut, qinnuteqartariaqartoq.

– Aappaaguluunniit nunatsinni sumiluunniit datacenterimik pilersitsinissamut ajornanngitsumik sukkasuummillu aaqqiissutissaqanngilaq. Tusass immap naqqatigut kabelinik marlunnik atuisinnaassuseqarluartunik peqareerpoq, taakkualu datacenterimik pilersitsinissamut naammapput, Inuussutissarsiornermut Naalakkersuisoqarfik naapertorlugu piumasarineqarpoq datacenterip illoqarfimmi immap naqqatigut kabeleqarfiusumi – tassa Aasianni, Sisimiuni, Maniitsumi, Nuummi imaluunniit Qaqortumi – pilersinneqarnera oqartussanillu attuumassuteqartunit akuerineqaqqaarnera.

Nunap iluanaarutai

Erngup nukinganik nukissiorfiliornerup aamma datacenterimik Kalaallit Nunaannut isertitaqarsinnaanerat pillugu, erngup nukinganik nukissiorfimmiit isertitat kisiisa allaaserisaminni eqqaasimallugit, assersuutigalugulu qarasaasianut datacentereqarnermiit isertitat suliniutip pineqartup misissoqqissaarneqarnissaa pisariaqartikkaat, Naalakkersuisoqarfik nassuiaavoq

– Neqeroortitsinerup ilagaa suliassaqartitsinermut isumaqatigiissut aamma Impact Benefit Agreement (IBA) aatsitassarsiornermi suliniutinut assingusumik isumaqatigiissutigineqassapput. Qanoq imaqarnersut, piumasaqartut qanoq ittunik suliniuteqarnersut apeqqutaapput, taamaattumillu neqeroortitsinermi ajugaasup isumaqatiginninniarfigissavaa, Naaja H. Nathanielsen oqarpoq, naatsorsuutigaali datacenterip ingerlanneqarnerani nunaminertamik atuineq akilerneqassasoq, innaallagissamik pisineq, suliffeqarfinnut akileraarutit suliffiillu taakkunannga aallaaveqartut inuiaqatigiinnut iluaqutaajumaartut.

- Pilersinneqarnerani suliassat annertunerussapput, sanaartornermi sulisunit akileraarutitigut isertitaqarnermik kinguneqassallutik inuiaqatigiinnilu nalinginnaasumik suliaqarnerulernermik ilaatigut kiffartuussinernik assigiinngitsunik pisinikkut, Naaja H. Nathanielsen oqarpoq erseqqissarlugulu Amerikamiut nunami aningaasaliinissaannut akornutaasinnaanngitsoq, soorunamili malittarisassat sinaakkusersorneqartullu allanut tamanut atuuttut malinneqassapput.

Sermitsiap Svend Hardenberg suliniut pillugu pissarsiariniarsimagaluarpaa, taamaatsorli ilisimatitsivoq piffissami matumani apersorneqarnissani kissaatiginangu.