Australiamiut aatsitassarsioqatigiiffiat Energy Transition Minerals, Kalaallit Nunaanni immikkoortortaqarfitsik Greenland Minerals aqqutigalugu Kuannersuarni piiaanissamut akuersissutissamik eqqunngitsumik itigartinneqarsimasutut isumaqarlutik Namminersorlutik Oqartussat eqqartuussivimmut suliassanngortissimasut, maanna Nasdaq-imi børsimut ilanngunneqarsinnaanerluni misissuileruttorpoq.
Nasdaq-imi nalunaarsorneqarnnermikkut Amerikami aningaasaliisunut qaninnerulernissartik siunertaralugu, suliffeqarfik nalunaarummi nutaami ilisimatitsivoq. Taamaaliornermi Critical Metals Corpip periusissiaatut iliortoqassaaq.
Australiamiut aatsitassarsioqatigiiffiat Energy Transition Minerals, Kalaallit Nunaanni immikkoortortaqarfitsik Greenland Minerals aqqutigalugu Kuannersuarni piiaanissamut akuersissutissamik eqqunngitsumik itigartinneqarsimasutut isumaqarlutik Namminersorlutik Oqartussat eqqartuussivimmut suliassanngortissimasut, maanna Nasdaq-imi børsimut ilanngunneqarsinnaanerluni misissuileruttorpoq.
Nasdaq-imi nalunaarsorneqarnnermikkut Amerikami aningaasaliisunut qaninnerulernissartik siunertaralugu, suliffeqarfik nalunaarummi nutaami ilisimatitsivoq. Taamaaliornermi Critical Metals Corpip periusissiaatut iliortoqassaaq.
Aningaasaliisarfiit Cohen & Company Market New Yorkimeersoq Energy Transition Mineralsip Nasdaq-imi nalunaarsorneqarnissaanik misissuinissamut siunnersornissaanullu suliakkerneqarpoq.
Aningaaserivik aningaasaliisartoq SPAC-imik (Special Purpose Acquisition Company) taaneqartartumik, Australiamiut suliffeqarfiutaat Kalaallit Nunaanni soqutigisaqartoq alla, Critical Metals Corp, siorna børsimi nalunaarsorneqarmat atorneqarsimasoq, misilittagaqarluarpoq.
Aamma tassani suliaq Cohen & Company Marketimit suliarineqarpoq.
USA-mi niuerfinnut iserneq
ETM-ip pisortaanera Daniel Mamadou naapertorlugu, suliffeqarfiup periusissiaa nunat killermiut Kinap aatsitassanik qaqutigoortunik pilersuinermi kisermaassineranik unitsitsinissamik kissaataannut naapertuuppoq. "Tamannalu USA-mit siuarsarneqarpat Nasdaq-imi nalunaarsorneqarnissaq silatusaarnerussaaq, tassani aningaasaliisussanik tapersersuisinnaassagatta periusissiallu tulliata ingerlateqqinnissaanut aningaasanik pissarsisinnaassagatta,“ Daniel Mamadou børsimi nalunaarummi oqarpoq, oqaatigalugulu "Kuannersuarni suliniummi naleqangaartumik piginneqataasunut soqutigisaqartullu allanut iluaqutaasumik pissarsinissamut Cohen-ikkut suleqatiginissaat qilanaarisimallugu“.
Aalborgip universitetiani professori Per Nikolaj Bukh isumaqarpoq Energy Transition Mineralsip USA-mi børsimi nalunaarsorneqarnissamik soqutiginninnera Namminersorlutik Oqartussanut eqqartuussivimmi suliassiissutigineqarsinnaasunik aningaasanik pissarsiniarnerusoq.
Assi: Aalborg Universitet
Eqqartuussivilersuussinermi aningaasartuutissat
Aalborg Universitetimi aningaasaqarnermut professorip Per Nikolaj Bukhip aamma børsimi nalunaarut atuarpaa, naliliillunilu USA-mi børsimut ilanngunneqarsinnaaneq Kalaallit Nunaanni eqqartuussivimmut suliassanngortitsinissamut aningaasaliissutinik pissarsiniarnermut tunngasoq.
– Ingerlatseqatigiiffik eqqartuussivimmi suliassanngortitsinissamut aningaasanik pisariaqartitsivoq, tamannalu inissinneqarluartariaqarpoq tatineqangaartinnani. Aamma suliffeqarfik eqqartuussivimmi ajugaassagaluaruni, isumaqatigiittoqassagaluarpat aningaasalluunniit aningaasaliissutigisimasani utertinneqassagaluarpata iluanaarsinnaassaaq.
Ingerlatseqatigiiffiup piumasaqaatigaa Kuannersuarni suliniummik ingerlatitseqqiisinnaaneq. Tamannalu pisinnaanngippat 76 mia. koruuninik Namminersorlutik Oqartussanit taarsiiffigitinnissaq.
Piffissaq nalaatsornerinnaanngitsoq
Per Nikolaj Bukhip maluginiarpaa Trumpip 2025-mi arlaleriarluni oqartarnera USA-p Kalaallit Nunaat pisariaqartikkaa nunap isumannaatsuuneranut tunngatillugu, matumani piffissagitititaasumi suliffeqarfimmi pisunut naapertuuttoq.
– Trumpip Kalaallit Nunaat arlaatigut tigusinnaanera Amerikami aningaasaliisartut annikitsuinnarmilluunniit upperigunikku, ingerlatseqatigiiffimmut aningaasaleeqataanissaat ilimanaateqarluarpoq, tassami USA-p Kalaallit Nunaat isumaqatigiissusioqatiginissaanut sunnersinnaappagu tamanna inuussutissarsiuteqarnerup iluani allanut aningaasaliinissamut periarfissaqalersinnaammagu, Per Nikolaj Bukh oqarpoq.
Amerikamiumik siunnersortissarsiortoq
Qaammatialuit matuma siorna ETM nalunaarpoq Danmarkimiit siunnersortissaminnik toqqaallutik. Tassa siornatigut nunanut allanut ministeriusimasoq Jeppe Kofod aamma USA-mi, Kinami Tysklandimilu ambassadøriusoq Friis Arne Petersen.
Aammattaaq suliffeqarfik allappoq Amerikamiumik siunnersortissarsiorniarlutik, taannalu aningaasaliisartunut Amerikamilu politikerinut attaveqarnernik nukittorsaasuussaaq.
Energy Transition Mineralsip/Greenland Mineralsip Namminersorlutillu Oqartussat suliami ataatsimeeqatiginissaat siulleq 2026-mi januaarip aqqaneq-aappaanni pissaaq, tamatumalu kingorna suliassap qanoq ingerlaqqinnissaanut pilersaarut saqqummiunneqassasoq naatsorsuutigineqarpoq.
