Kukkunersiuisoq mianersoqqusivoq: – Suliffeqarfiit ingasattajaartumik akileraaruteqartinneqarput

Inatsisissatut siunnersuut akerleriissutaasoq ulluni makkunani politikkikkut suliarineqarpoq. Aningaasaqarnermut Akileraartarnermullu Naalakkersuisup, Muté B. Egedep, IA-meersup siunnersuutaa suliffeqarfinnut akileraarutinut maleruagassat sukaterniarlugit siunnersuutaavoq.

Akileraartarnermut inatsisip allanngortinneqarnissaanut siunnersuut, Inatsisartuni siullermeerneqartoq, aqqutigalugu aningaasat Kalaallit Nunaanni pissarsiarineqartut akileraarutitaqanngitsumik nunamit anisassanngitsut aningaasaqarnermut akileraartarnermullu naalakkersuisup qulakkeerniarpaa.

Nunami matumani naalakkersuisut kingunerlutsitsingaartunik akileraarutinut inatsisiliorsimapput.

Kukkunersiuisoq Per Laugesen, Kalaallit Nunaanni kukkunersiuisartut annersaannit Grønlands Revision A/S-imeersoq taama isumaqarpoq.

AAMMA ATUARUK

– Aningaasanik akileraarutitaqanngitsumik nunamit anisoqarsinnaanngilaq

- Inatsisissatut siunnersuummi suliffeqarfinnik matusinissamut ersarissumik kajumissaarisoqarpoq. Nunatsinnit nunanillu allaneersunit aningaasaliissuteqarnermut kinguaariillu nikinnerannut eqqaanarsinnaasut tamarmik 17-imiit 19 procentimut akileraaruserneqarsinnaapput.

- Ingerlatseqatigiiffiit nalinginnaasumik 25 procentimiit 39 procentimut akileraaruserneqartarnerat aningaasallu ingerlatseqatigiiffimmut aningaasaliissutigineqartut akileraaruserneqareernerisa saniatigut immikkut akileraarutaavoq, Per Laugesen oqarpoq.

Suliffeqarfiutillit nunanit allaneersut qimagutissasut

Kalaallit Nunaanni 17-19 procentimik immikkut akileraartitsisoqalissagaluarpat nunanit allaneersut suliffeqarfiutaat Kalaallit Nunaanni pisortaqarfeqalernavianngitsut taassuma erseqqissarpaa.

Assersuutigalugu pisortaq soraarpat, Kalaallit Nunaannilu nutaamik aqutsisoqalernissaata tungaanut Danmarkimi nunaniluunniit allani suliffeqarfiup immikkoortortaqarfianit taartaasumik atorfinitsitsisoqartariaqarpat Kalaallit Nunaanni suliffeqarfik immikkoortortaqarfiusoq 17-19 procentimik akileraartartussanngoratarsinnaavoq. Tamanna naapertuilluanngitsutut oqaatigaa.

- Akileraarut nutaaq atorlugu suliffeqarfiit marloriaammik, pingasoriaammik sisamariaammilluunniit akileraaruserneqartassapput, Per Laugesen oqarpoq.

Ingerlatseqatigiiffimmut aningaasaliissutit 42 procentimik akileraaruserneqartarput. Isertitat 25 procentip missaanik ataavartumik akileraaruserneqartarlutik. Ingerlatseqatigiiffik matuneqanngikkaluarpalluunniit matusinermut akileraarut 17-19 procentiuvoq, piginnittullu pissarsiaminik agguaassippata iluanaarutinut akileraarut 42 procentiuvoq.

- Naalakkersuisut siunnersuutaanni, maanna Inatsisartuni suliarineqartumi, nunatsinni suliffeqarfimmik pilersitsineq imaluunniit suliffeqarfimmi sipaarniuteqarnissaq imminut akilersinnaanngitsoq Kalaallit Nunaanni, Danmarkimi nunanilu allani suliffeqarfiutilinnik tamanik ersarissumik oqariartuuteqartoqarpoq.

- Naapertuilluannginneq tassaavoq siunnersuutip oqaaseqaataani allassimasutut suliffeqarfinnik piginnittut ima oqarfigineqaannartut: Suliffeqarfiit matujuk imaluunniit akileraarutit 17-19 procentimik qaffanniarsigit, Per Laugesen oqarpoq.

Knud pillugu oqaluttuaq

Pisortat Kalaallit Nunaanni najugaqarunnaarpata ingerlatseqatigiiffik aamma 17-19 procentinik akileraartassaaq, tassa akiligassiissutigineqartartumik akileraaruserneqassaaq. Akileraarutip tamatuma saniatigut aningaasat pilersinneqarnermi kingornaluunniit ingerlatseqatigiiffimmut isertitat akileraaruserneqareerput.

Knud Laursen, Maniitsumi Auto og Marineservice Centerimi, AMS-imi, pingaarnertut pisortaasoq piginneqataasorlu pillugu qaammat kingulleq allaaserisaqarpugut.

Ingerlatseqatigiiffik 20 millionit koruuninik nammineq aningaasaateqartoq, inatsisissatut siunnersuut Inatsisartuni akuerineqarpat 3 million koruunit missaanni akileraarutitigut akiligassinneqassaaq. Knud Laursen kræfterluni Aalborg Universitetshospitalimi katsorsarneqarnermini Danmarkimut nuuttariaqalersimavoq.

Knud Laursen peqqissutsini navianartorsiortikkumanagu, immaqa ukiumi ataatsimi marlunniluunniit katsorsartinnermini, Danmarkimiiginnarallarniarpoq.

Inatsisartut Aningaasaqarnermut Akileraartarnermullu Ataatsimiititaliaata inatsisissatut siunnersuut novembarip 18-ani oqaluuserissavaa. Taanna 2026-mi februaarip aallartinnerani Inatsisartuni aappassaaneerneqassaaq.