Quersuaq tuniniarneqartoq

Kalaallit Nunaanni poortuutissat puuiaasalu utertinnissaannut inatsimmi 2024-mi atuutilersumi allannguutit suli nunatsinni inuussutissarsiornerup aaqqissuussaaneranut allanngortitsipput.

Baajanik sodavandinillu maqitsiviup Nuuk Imerup 2024-mi matuneqarnera, tassanilu sulisut 50-it soraarsitaanerat kingunerusuni malunnarnerpaavoq. Maanna KNI-p Nuummi, Maniitsumi Qaqortumilu quersuani matullugillu sulisuni 14-it soraarsippai.

- Quersuaqarneq KNI-p immiaaqqanik imernillu assartuinermik akisussaaffeqarnerani aallartinneqarpoq. Tamanna inatsisit allanngortinneqarnerisa kingorna atorunnaarsinneqarpoq, maannami atuisut nioqqutissat pilersuisumit toqqaannartumik pissarsiarisarpaat.

- Taamaammat quersuaqarnerup aallaqqaammut siunertarisimasaa atorunnaarpoq, KNI-mi sulisoqarnermut, attaveqatigiinnermut piujuartitsinermullu pisortaq Juliane Henningsen Heilmann Sermitsiamut allappoq.

Malittarisassat nutaat

AAMMA ATUARUK

KNI-p Nuummi, Maniitsumi Qaqortumilu quersuaqarfiit matuai

Nuuk Imerup puujaasaatai utertittakkat kisimik atorneqarsinnaanikuummata KNI Kalaallit Nunaanni immiaaqqanik imernillu assartuinermi siornatigut kisermaassilluni oqartussaavoq. Malittarisassat nutaat 2024-mi atuutilermata puut utertinneqarsinnaasut allat – pingaartumik qillertuusat – atorneqarsinnaanngorput.

Tamanna atuisartut niuertarfinni amerlanerusunik toqqaasinnaalernerannik kinguneqarpoq. Tassa imaappoq immiaaqqat assigiinngitsut sodavandillu piumaneqarluartut arlallit, ilaatigut Pepsi Max, amerlanerujussuupput. Aammali nunatsinni Nuuk Imermit puiaasamik Faxe Kondimik liiterip affaanik imalimmik piumaneqarluartumik, piffissap ingerlanerani kalaallinut ilisarnaataalersimasumik, inuulluaqqusariaqarnitsinnik isumaqarpoq.

Allannguinertaaq pisiniarfinni ajornartorsiortitsillunilu isumakuluuteqalersitsisarpoq. Pisiniarfiimmi puut utertinneqarsinnaasut assigiinngitsorpassuit piareersimaffiginngilluinnarpaat. Pisulli pereerput.

Poortutissanuttaaq inatsisit allanngortinneqarnerat RAL-imut, siornatigut Nuuk Imerup puukuutaanik sineriammiit Nuummut umiarsuarmik assartuinermigut kaaviiaartitaqarluarsimasumut, sunniuteqarpoq. Nuuk Imerup puujutai qillertuusanngortinneqarlutillu puiaasnut plastikkiusunut atoqqitassanngorlugit nassiunneqartartussanut taarsiunneqarput, puummi utertinneqartartussat pisiniarfinni naqiterneqartarput – taamaammallu puukunik umiarsuarmik assartuineq siornatigutut niuerutigineqarunnaarpoq.

Quersuaq tuniniarneqartoq

Maanna Nuummi umiarsualivitoqqami quersuaq tuniniarneqalerpoq.

Royal Arctic Linep illorsuaq pigaa, Qeqertanili assartuisarfiup nutaap ammarneqarnerata kingorna umiarsualivitoqqami quersuaqarnissaq pisariaarukkiartuaarpoq. Quersuaq arlalinnik attartortoqarpoq. KNI-p maannamut quersuata saniatigut ilaatigut KK Engros, GFLK aamma Issittumi Sakkutooqarfik tassaniipput.

Illorsuaq immikkoortut pingasunngorlugu sananeqarpoq, siullermik 1970-imi, taavalu 1982-imi allilerneqaqqaariarluni kingullermik 1988-imi allilerneqarpoq.

Quersuaq Lynges.gl tuniniaasoralugu tuniniarneqarpoq, piginnittuata cand.jur. Miki Lyngep illorsuaq 9.132 m2-nik initussusilik inuussutissarsiorfiusinnaasoq 110 millioner koruuneqartussanngorlugu tuniniarpaa.

Tassaniipput quersuaq allaffilik 6014 m2-it missaannik initussusilik, allaffiit allat 879 m2-it missaannik initussusillit, sannavik 345 m2-it missaannik initussusilik kiisalu nillataartitsiviit qerititsiviillu 1894 m2-it missaannik initussusillit.

Miki Lyngep illorsuaq kimit pisiarineqassanersoq takorloorneraa Sermitsiamit aperaarput, taassumali tamanna oqaatigiumanngilaa.

- Maannakkut niuerfissaq misissorparput, qanorli soqutigineqartiginersoq oqaatigiumanngilara. Illorsuarli inuussutissarsiornermut naleqqukkami pilerinartuullunilu assartuinermut, allaffimmut quersuarmullu periarfissarpassuaqarpoq, taamaammat tunissaqqaarparput, illunik tuniniaasartoq inatsisilerituutut ilinniarsimasoq isumalluarluni oqarpoq.

Nuuk Imeq matummat tunisassiorfiup illorsuartaa umiarsuaatileqatigiiffimmut Blue Waterimut tunineqarpoq, taannalu maqitsivitoqqami quersuaqalerlunilu Kalaallit Nunaanni qullersaqarfittaarpoq.

Illorsuaq 9.800 kvadratmeterisut angissuseqarpoq – tassa quersuup maanna tuniniarneqartup angissusiatut angissuseqarpoq. Blue Water ingerlatseqatigiiffiup nammineq paasissutissaatai naapertorlugit Nuuk Imerup illorsuakua 100 millionit koruunilerlugu pisiarinikuuaa.