RG-mi siulittaasoq Aasianni suliffissuaq pillugu: Sioorasaarineq imaluunniit illoqarfik sallunaveeqqusiullugu aalajangiisitsiniarneq isumaqatiginngilarput

Royal Greenlandip siulersuisuini siulittaasoq Niels Thomsen Aasianni tunisassiorfissuaq pillugu oqallinnermut akuliuppoq. Illoqarfimmut pingaaruteqartumik tunisassiorfissuarmik piginnittut Polar Seafood arlaleriarlutik matusiniarlutik nalunaaruteqartarneranni, oqallinneq piffissami sivisuumi ingerlanneqarpoq.

Royal Greenland suliffissuarmut tunngatillugu aaqqiissutissamik nassaarnissaminut piareersimasoq, Niels Thomsen allappoq:

- Maanna oqallinnermi isumaqartitsiniaasoqarsimavoq, aaqqiissutissaq aalajangersimasoq toqqarneqanngippat tunisassiorfik matuneqariaannaasoq.

AAMMA ATUARUK

Aasiaat tunisassiorfiata pisassiissutit tamakkertut nalunaarutigaa: Tunisineq unitsinneqarpoq – misileraalluni aalisarneq piffissami sivikitsumi ingerlassaaq

- Uagut sioorasaarineq imaluunniit illoqarfik sallunaveeqqusiullugu aalajangiisitsiniarneq isumaqatiginngilarput, kisianni piffissap ingerlanerani tunisassiorfik matuneqaratarsinnaalissappat, Royal Greenlandip soorunami tamanna nalilersussavaa aaqqiissutissamillu nassaarniarluni misilissallugu, Niels Thomsen allappoq.

Naalakkersuisut neqeroorutit tiguneqartut naliliiffigissavaat pisassiissutillu pillugit aalajangiissallutik.

Neqeroortitsisoqarpoq, taakkualu aappaa Aasianni aalisakkerivimmi suliffissat amerlanerpaat qulakkeerniarlugit suliarineqarpoq.

Kitaani qalerallit 2.470 tonsit Tunumilu saarulliit 5.000 tonsit neqeroorutigineqarput, ingerlatseqatigiiffiillu marluk pisassiissutit pillugit neqeroorsimapput. Royal Greenland taakkununnga ilaavoq.

75 procentit tulaanneqarnissaanik siunniussaqartut

Niels Thomsen naapertorlugu Aasiaat Trawl Royal Greenlandimik ingerlatseqatigiiffiit allat peqatigalugit pilersitseqataasoq neqeroornermini pisat 75 procentii Aasianni tulaassussallugit, naak neqeroorutigineqartut 25 procentiusariaqaraluartut.

Siulersuisuni siulittaasup tikkuarpaa Royal Greenland sinerissami sumiiffinni arlalinni tunisassiorfippassuaqareersoq, tassanilu niuerneq ajornaatsuujuaannarneq ajorpoq, Aasiaallu ikiorneqarnissaanut piareersimasoq:

- Taamaattumik Aasianni tulaassisisinnaanermut periarfissat suliffissallu aarlerinartorsiulissagaluarpata, pisinnaasagut, misilittakkagut najuunnerpullu atorlugit aaqqiissutissap nassaarineqarnissaanut qanoq peqataasinnaanerluta misissuinissamut aamma piareersimassaagut. Tamanna aaqqiissutissamik aalajangersimasumik siumoortumik neriorsuinerunngilaq. Akisussaaffitsinnilli pimoorussinitsinnut takussutissaavoq. Tamannami kikkut pisassiissutinik pissarsinissaannit tamanna pingaaruteqarneruvoq.

AAMMA ATUARUK

Aalisarnermut ingerlatseqatigiiffippassuit nutaat pisassiissuterpassuit pilerngukkaat

Ingerlatseqatigiiffik pisassiissutinik neqerooruteqarsimasoq alla tassaavoq Qeqertalik Seafood. Ingerlatseqatigiiffimmik pilersitsisut ilagaat Polar Seafoodimi qullersat Miki Brøns aamma Bent Salling, taakkulu marluk ingerlatseqatigiiffimmi pisortaapput.