Tasiilami 200-nik suliffiissaleqisoqaraluartoq sulisussanik avataaneersunik tikisitsisoqalersoq

Tasiilami aalisakkanik tunitsiviliortoqartussanngormat suliffissanik pilersitsinissaa isumalluarfigineqarsimaqaaq. Saarulliilli takkusimaarneranni tunitsiviup ataavartumik tigooraanissaa anguniarlugu Royal Greenland sulisussanik nunanit avannarlerneersunit tikisitsisussanngorpoq. Tunitsivimmi sulisut amigaataanerat peqqutigalugu aalisartut siorna ullut ilaanni tunisisinnaasarsimannginnamik avataaniit suliartortussat tikilluaqquaat.

Tasiilami aalisakkanik tunitsiviup ilassutaa siorna atorneqalerpoq. Tunitsivimmut Sermitsiamit siorna pulaaratta sulisut, allaffimmi sulisut ilanngullugit, 13-iupput.

Foto: Oscar Scott Carl

Arnaq Nielsen Arnaq Nielsen tusagassiortoq

Saqqummersinneqarpoq 2. Juuli 2026 - 11:51

Ussassaarut

Tasiilami KNAPK-p immikkoortortaqarfiani siulittaasoq Jonathan Ignatiussen siorna saarulliit takkusimaaleruttorneranni illoqarfimmi tunitsivimmut tunisiniartilluni ilaanni tunisisinnaasarsimanngilaq.

- Sapaatip akunnerata naanerani nalaattarparput, immaqa sapaatit akunnerisa naaneri tamaasaanngikkaluartoq, Jonathan Ignatiussen oqarpoq.

Sulisussaqannginnera tunisisinnaannginnermut peqqutaasartoq paasitinneqartarput. Aalisartunilu tunitsiviup matoqqanera peqqutaalluni Tasiilami tunitsivimmut tunisinngitsoortartuni kisimiinngilaq. Ilaasortamimmi tamanna aamma misigisaraat ilisimavaa.

Nunanit avannarlerneersut suliartulersut

Ussassaarut

Tasiilami tunitsivimmut avataaniit suliartortoqartussanngornera pilersaarutaasoq Royal Greenlandimeersunit ataatsimeeqateqarnerminni paasisimallugu Jonathan Ignatiussenip oqaluttuaraa.

Avataaniit suliartortussat tassaapput inuusuttut sisamat nunanit avannarlerneersut, aamma nordjobberinik taaneqartartut. Taakku piffissami killilikkami suleqataassapput.

- Sumiiffimmi najugalinnik tunitsivitsinni tamani Royal Greenlandimit ataavartumik sulilersitsiuartarpugut. Ilaannili avataaniit suliartortunit pisariaqartitsilersarluta. Sumiiffinni tigooraasinnaanissarput tulaanneqartunillu suliaqarsinnaanissarput qulakkeerniarlugu taamaaliortarpugut. Aamma Tasiilaq pineqarpoq, Royal Greenlandimi ingerlatsinermut pisortaq Sten Sørensen allakkatigut taama akissuteqarpoq.

Tasiilami tunitsivik siorna ammarmat ammaqqaarnermi ajornartorsiutit sumiluunniit nalaanneqartartut nalaanneqarput. Qerigasuartitsiviup ajoquteqallattaanera ajornartorsiutinut ilaavoq.

Tunitsivik nutaajugaluartoq aalajaatsunik sulisoqarlutik Sten Sørensenip nassuiaatigaa. Saarulliilli juulip naanerani aggustilluunniit aallartinnerani takkusimaalerpata avataaniit sulisussanik pisariaqartitsilissapput.

- Suliassaqarlualerpat - soorlu saarulliit qanittukkut takkusimaalerpata - sulisinnaasunik amerlanerusunik pisariaqartitsilissaagut. Aalisartut amerlanerpaat tunitsivimmut tunisisinnaanissaat qulakkiissallugu pingaarnerpaavoq, taamaalillutami tunisisoqarnissaa, Tasiilamilu naleqarnerulersitsinissaq angussavarput, Sten Sørensen allappoq.

Jonathan Ignatiussenip saarullittani takutippaa. Saarulliit Tasiilap eqqaanut juulip naaneraniit aggustilluunniit aallartinneraniit qaammatini sisamani tallimaniluunniit takkusimaartartut anngajaarsuusut takuneqarsinnaavoq.

Kuummiinut tunisiartussaarnissani qilanaaraa

AAMMA ATUARUK

– Aalisakkanut tunitsivik aalisartunut isaatitsissutaalluarsinnaagami pingaaruteqarpoq

Kisitsisit kingulliit apriilimeersut qiviaraanni Tasiilami suliffissarsiortut 201-iupput. Nunatsinni illoqarfiit suliffissaaleqiffiunerpaat ilaanni sooq avataaniit suliartortitsinissaq pisariaqarnersoq Royal Greenlandimut apeqqutigaarput, taakkuli qulaani akissutaasunut innersuussiinnarput.

Jonathan Ignatiussenilli avataaniit suliartortussat tikilluaqquai.

- Ajorinngilarput. Ammaannarnissaa tunisinerullu ingerlaannarnissaa eqqarsaatigalugu ajorinngilarput, Jonathan Ignatiussen taama oqarpoq.

Jonathan Ignatiussen aalisartoqatinilu Tasiilamut tunisisinnaanngikkaangamik Kuummiini tunitsivimmut tunisiartortariaqartarput. Useqarluartillutik 2 tiimit Kuummiinukarusaarsinnaasaramik orsussamut aningaasartuuteqarnerusarlutillu piffissartungaatsiartarput.

Taamaammat Tasiilami tunitsivik saarulliit takkusimaarneranni matusaqattaassanngitsoq neriuutigaa. Sulisummi holdi ataasiinnaajunnaarlutik holdit marlunngortinneqarumaartut Royal Greenlandimit ataatsimeeqateqaramik paasisaminnut ilaasoq Jonathan Ignatiussenip ilanngullugu oqaluttuaraa.