Tunisassiorfiup oquutaq avammut niuerutigerusukkaa: Aalisartut pisarisuugaannik atorluaanerorusuppugut

Oquutaq. Aalisagaq taanna sinerissamut qanittumi aalisartut pisarigaagamikku amerlanertigut imaanut igiinnartarpaat. Uumappat toqugappalluunniit. Aalisagarli taanna aalisartumit pisarineqaruni aalisartumit aamma aningaasarsiutaasariaqartoq, Ilulissani tunisassiorfimmi, Halibut Greenlandimi pisortaq, Erik Sivertsen isumaqarpoq.

- Kalaallit Nunaanni ningittagarsorneq ataatsimut isigalugu naluarput aalisakkat pisarisuukkat qanoq amerlatiginersut imaanut uterteqqiinnarneqartarnersut, toqugasut uumasullu. Taamaattumik imartarput pissaqarluartitsisoq atorluarniarutsigu aamma tamakkua tigooqqartariaqarpagut, Erik Sivertsen Sermitsiamut oqarpoq.

Tunisassiorfiup oquutaq aalisartumit pisiarissallugu avammullu niuerutissallugu maanna pilersaarutigaa.  

- Aalisartut pisarisareerpaat aamma nunarsuatsinni oquutanik niuerfinnik peqareerpoq. Taava uatsinniikkami arsaq, uagununa qanoq iliorniaripput? Piujuartitsineq pillugu tassuuna iliuuseqaqataarusuppugut, pisortaq oqarpoq.

AAMMA ATUARUK:

Halibut Greenlandip Ilulissani tunisassiorfini 50 millionit sinnerlugit atorlugit allililerpaa

Aalisartulli qaqugu oquuttanik Halibut Greenlandimut niooraalersinnaanersut suli nalunarpoq. Tunisassiorfimmi atortut tulluarsarnissaat aammalu Inuussutissalerinermut Aqutsisoqarfimmut nalunaarutiginninnissaq maanna suliarineqaqqaassasoq, pisortaq oqarpoq. 

Siorna avammut tunineqartut

Kilomut qanoq akilerlugu tigooraanissartik aamma maanna akisinnaangilaa. 

- Tuniniaasugut tuninerani akinik maannakkut paasiniaapput, taakkulu paaseriarutsigit pisiarinerani akeq nalunaarutigineqassooq, Erik Sivertsen ilisimatitsivoq.

Kalaallit Nunaanni Naatsorsueqqissaartarfiup Sermitsiamut ilisimatitsinera naapertorlugu oquuttat Danmarkimut tunisat 2025-imi 1,6 tonsinik oqimaassuseqarput. Taakkua avammut tunineranni kilomut koruuninik 15-ini akeqartut tassanngaanniit aamma nalunaarput. 

Sermitsiap Pinngortitaleriffik sinerissap qanittuani oquutaqqassuseq qanoq innersoq pillugu attaveqarfigaa. Taakkuali paasissutissaateqarpallaanngillat. Suliffeqarfimmi Aalisakkanik Qalerualinnillu Immikkoortoqarfimmi pisortaq allakkatigut akissuteqarpoq.

- Misissuinitsinni ajoraluartumik paasissutissat naammattut piginngilagut, taamaattumik imartani sinerissamut qanittuniittuni pissutsit pillugit annertunerusumik oqaaseqarsinnaanngilagut, Søren Lorenzen Post allappoq.

Pisarisuukkat allat aamma tigooqqaraat

Sinerissamut qanittumi aalisartut qaleralinnik saarullinnillu aalisarnerminni aalisagaqatigiit allat aamma pisarisoortarpaat. Soorlu Eqalussuup nuliai, saviup puui, qeeqqat, suluppaakkallu. Taakkua tamaasa aamma tunisassiorfiup tigoorarai, tamannalu aalisartumut aningaasanngortillugu utertinneqartartoq, pisortaq oqarpoq.

- Piginnittutta 90 procentii sinnerlugit aalisartuupput. Taamaattumik soqutigisariaqarparput taakkua pisarisoortagaasa tunisassiarinissaat, aalisartumut naleqarnerussammat, immamut igillugit uterteqqinneranit, Erik Sivertsen oqarpoq.

Taassuma aamma oqaatigaa Aqutsiveqarfik 47-mi, tassa Upernaviup, Uummannap Qeqertarsuullu Tunuani sinerissamut qanittumi ningittagarsorluni aalisarnermi pisarisoortakkat qanoq oqimaatsigisut atorluarneqannginnerat, taamaalillunilu aamma aningaasap annaasap qanoq annertutiginera oqaatigineqarsinnaanngitsoq.