KL

DK

Aalborgip Kommuneqarfik Sermersooq kulturikkut suleqatigerusuppaa

Aalborgip Kommuneqarfik Sermersooq 2032-mi Europap kulturikkut illoqarfiisa pingaarnersaannut qinnuteqaatiminut peqataatikkusuppaa. Ilaserinninneq Kommuneqarfik Sermersuumi Aningaasaqarnernut Inuussutissarsiornermullu Ataatsimiititaliap ataatsimiinnermini marlunngornermi eqqartussavaat.

Aalborgimi karnevaali kulturikkut ukiumoortumik pisoqarfiusarpoq. Limfjordsbroenimi 2023-mi assi.
Morten Okkels Morten Okkels Tusagassiortoq
Saqqummersinneqarpoq

Aalborgip 2032-mi Europap kulturikkut illoqarfiisa pingaarnersaannut inissinniarnermi suliniummi Kommuneqarfik Sermersooq peqataanissamut periarfissaqarpoq.

Aalborgip kommuniata qinnuteqaat Jyllandip avannaani kommunit allat peqatigalugit suliaraa, Kommuneqarfik Sermersoorlu suleqatigiinneq ”Aalborg 2032 & Around”-imik taaguutilik peqataaffiginissaanut peqatiseraa.

– Qularinngilarput Kommuneqarfik Sermersuup Kalaallit Nunaatalu peqataanerat Danmarkip kultorikkut illoqarfiit pingaarnersatut suliniutaanut nukittunerulersitsinissaa, qaaqqusissummi allassimavoq.

EUROPAMIUT KULTORIKKUT ILLOQARFIISA PINGAARNERSAAT

Europap kulturikkut illoqarfiisa pingaarnersaat sammisassaqarfiusoq (siusinn. europamiut kultorikkut illoqarfiat) 1985-imiilli piulerpoq.

Europami kulturikkut illoqarfiit pingaarnersaat, illoqarfiuvoq illoqarfik kulturikkut amerlasuunik kingornussassalik, kulturikkut inuunermik pisuussutillit, aamma Europap assigiinngissusersuanut takutitsisuusoq.

Kulturikkut illoqarfiit pingaarnersaat nunanit tamalaanit takornariarneqartussatut aamma illoqarfiup innuttaasuinut nunallu innuttaasuinut isumassarsisitsisussatut pilersinneqassaaq.

Najoqqutaq: Folketingip EU pillugu paasissutissiissutai

Qaaqqusissut Kommuneqarfik Sermersuumi Aningaasaqarnermut Inuussutissarsiornermullu Ataatsimiititap sisamanngornermi aggustip 20-ani ataatsimiinnerani maanna suliarineqassaaq.

Naligiittut suleqatigiinneq

Jyllandip avannaani kommunit allat atugassarititaat naligalugit peqataasinnaaneranik, Aalborgip kommuniata allakkatigut Kommuneqarfik Sermersooq neqeroorfigaa.

- Aalborgip kulturikkut illoqarfiit pingaarnersaattut toqqarneqarnerata kingunerisaanik 2028-mi aallartittussamut, 2032-milu naammassisussamut, Europap kulturikkut eqqumiitsuliortullu suleqatigiinneranni peqataanissamut periarfissaqalissaasi.

Kommuneqarfik Sermersuumi aqutsisut allattoqarfiata innersuussutigaa kommuni qinnuteqaateqartoqarnissaanut suleqataassasoq. Aalborgip Kommunia siullermeerluni ukioq manna oktoberip tallimaani qinnuteqassaaq.

Peqataaneq tamanna Kommuneqarfik Sermersuumut qanoq akeqassanersoq suli aalajangerneqanngilaq. Kommunip tapiissuteqarsinnaanera aatsaat isumaqatigiinniutigineqassaaq qinnuteqaatip inaarutaasumik 2027-mi suliarineqarnerani, ataatsimiititaliap allakkiaa naapertorlugu taama oqaatigineqarpoq.

kommuneqarfik sermersooq aalborg kulturi kulturikkut suleqatigiinneq europap kulturikkut illoqarfiisa pingaarnerat 2032 aalborg 2032 around

Atorfiit tamaasa takukkit

PODCASTI

Powered by Labrador CMS