Apriilip aallaqqaataat ilumoorsaannginnissamut periarfissaq

Apriilip aallaqqaataat salloqittaavik, ilaqutariit, nunaqqatigiit suliffeqarfiillu nuannersumik salloqittaaffittut atorluartarpaat. AG-miillu salloqittaavimmi oqaluttuat nuannersut sisamat katersorpagut.

Uungagooq sianilaarit

- Qanoq sallorujussuarnikuuisi salloqittaavimmi?

- Peterp aleqarpassuani salloqittartarpai. Taassuma sianeqquaatit sianilaarit, tulleriiaallugit tamaasa allaffigisarpai tassunga sianeqqusisut. Taannagooq sianeqqusisoq sianerfigisarpaat, paatsuungatitserujussuarluni, Paninnguaq Miunge AG-mut oqaluttuarpoq.

Qanormi aleqai qisuariartarpat?

- Ilai illartarput, ilai atia taallugu Piitaaq, nukillalaarpasillutik, Paninnguaq Miunge oqarpoq.

Qaanaami Pilersuisup pisiniarfia poorskikkunni matoqqassaaq

- Assiutikka misissorlugit arlaat chatgpt-mut (silassorissuusiaq, aaqq.) aaqqissortinniarlugu eqqarsalerpunga. Assilisara Qaanaami Pilersuisup poorskikkunni ammaffissai toqqarpara  aaqqissortinniarlugu, nalunaaqutai matoqqasussatut allassimasunngortinniarlugit, Aqattannguaq Qaerngaaq Qaanaami innuttaasoq, AG-mut oqaluttuarpoq.

Ullut tulleriit tallimat matoqqasussaasoq allaqqalerlutik. Uanga nammineq Facebookkimi qupperninnut ikkukkakku, malinnaasuinnannut takusassianngorlugu. Inuit asseq tigoriarlugu Facebookkimi “Qaanaap allagarsiivianut” siammartersimavaat.

Inuit assigiinngitsunik qisuariarrallutik, Qaanaami Pilersuisumi sulisut påskemi sulinngiffeqartalersimapput, allaat aamma ulluinnarni matoqqasalersimalluni. 

Aammaluunniimmi piffissami matumani Pilersuisormiut naatsorsueqqammeramik. 

Qisuariaatit sakkortusiartulermata, allaat niuertumik soraarsitserusulerlutik oqarlunga allaannarpunga chatgpt-ikkut asseq aaqqissortinnikuullugu sallullungalu, aqagu aatsaat sallullunga oqarniarlunga eqqarsaruttorlunga, Aqattannguaq Qaerngaaq illarluni oqaluttuarpoq.

Aliikkusersuisartussatut atorfinittoq

Atisaarniarfiup Inuit Quality Clothes of Greenlandip aliikkusersuisartoq Piitannguaq Alaufesen suleqatitaarisimallugu Facebookikkut ilisaritippaa. 

Ilanngullugu tallimanngornerit tamaasa pisiniarfimminni aliikkusersuisassasoq allapput.

Igaassat ullunut 365-inut

Igaassanik ataatsimoortunik ullunut 14-inut qaammammulluunniit pisiniartarnersi amigarilersimagussiuk nuannersumik nutaarsiassaqartoq, Brugseni Nuuk aamma allappoq.

Nuummi Brugsenip saqqummiuppaa ullunut 365-inut igaassat nioqqutigilersimallugit, taamaallaat 12.999,00 koruuninik akillit, Brugseni Nuuk Facebookkimi quppernermini allappoq.