Issittormiu asseqanngitsoq qimaguppoq

Ole Jørgen Hammekenip Inuit inuunerat, inooriaatsillu taamaattup pitsaassusaa, nunarsuup sinneranut takutinniarlugu ukiorpassuarni ilungersuuteqartuuvoq.

Nunarsuaq tamakkerlugu naggueqatigiit Inuit ulluanni toquvoq, ullormi pingaaruteqartumi inuunini tamaat aalajangiusimallugu pingaartitarisamini.

Nunarsuarmiooqatinut attaveqarneq annertusillugu shamanit Amazonimiittut inuillu angakkortaasa akornanni attaveqalersitsivoq.

Erfalasorput Qalasersuarmi, Amazonip orpippassuini, Tjukotkap masarsuani amunikuuaa - sumiiffinnik taakkuninnga piumasaqarnani inooriaatsit assiinngitsut taakkua ataqatigiilernissaat siunertaralugu, inooqataa Galya Morrell oqaluttuarpoq.

Kræftimut akiuunninni ilisimasassarsiornertut kingullertut taavaa, ajoraluartumilli aningorsinnaasimanagu.

Motzfeldtikkut aamma Maritha Hammekenillu qitornaasa nukarlersaattut Nuummi inunngorpoq. Qatanngutinilu pingasut Nuummi, Qeqertarsuatsiaani Paamiunilu peroriartorput, Qaqortumi realskolemi ilinniartuuvoq, Danmarkimilu ilinniarnertuunngorluni. Københavns Universitetimilu inatsisilerinermik ilinniagaqarluni Regensenimi inissaqalerluni.

Issittumiinnissanili orniginartinnerugamiuk ilinniakkani naammassinikuunngilaa.

Ole Jørgen Kalaallit Nunaanni, Issittumilu sumiiffippassuarni aamma Amerikami Kujallermi nunap inoqqaavi pillugit ilisimasassarsiorluni angalasarsimavoq.

Uummannami meeqqat angerlarsimaffianni sulinermini meeqqat marloriarluni Uummannamit avannamut Qimusseriarsuakkoorluni Qaanaamukaappai. Meeqqanut misigisaq nuanningaartoq perorsaataasoq.

Sermersuakkoorluni qimussimik Uummannamiit Ilulissanukarnikuuvoq - oqaluttuarnera naapertorlugu tassaasoq allakkerisutoqqat aqqutaat. Aqqut qummukajaaqarlunilu ammukajaaqaqisoq ulorianartunik quppalik.

Amerikamiu issittumi ilisimasassarsiortoq Dennis Schmidt peqatigalugu Avanersuarmi Peary Landimut ilisimasassarsiorlutik angalanikuupput, nunarsuarmilu qaqqani avannarpasinnerpaaq qaqinikuullugu. Hammeken Pointimik kingorna taagorneqalersoq Jonathan Motzfeltip nammineerluni qaqqap taama taaguuserneqarnissaa taperseraluaraa nunap atiinik nalunaarsuisartunit akuerineqarnikuunngilaq.

Ukiut qulit ingerlanerini umiatsiaaqqamik Pocamik ammasumik Issittup imartaani Qalasersuaq avannarleq tamaat kaajallappaa.

Paasisassarsiornermi aqutsisoq Anders Bilgram 2018-imi angalanertik pillugu atuakkamik saqqummersitsivoq: Eventyrlig ishavsfærd – umiatsiaaqqamik qalasersuarmi 26.000 kilometerimik isorartutigisumik angalanilikkersaarut. Ole Jørgenip 2000-imiit 2008 tikillugu angalanermut peqataanera oqaluttuarineqarpoq.

Angalanera sukkanerusinnaannginnersoq The Explorers Clubimi New yorkimiittumi aperineqarami naaggaarpoq, aqqutaanimi inunnik naapitassaqarami. Ole Jørgen ilisimasassarsiornermini sukkasuumik angalaneq pinnagu inuit ungasissumiittut puigorneqarsimasut naapitassani pingaartittarai Galya Morrisip nassuiaatigaa. Aqqutaani inoqarfinnut tikikkaangami uninngaffigeqqaarlugit oqaluttuassaat tusarnaaqqaartarpai.

Ole Jørgen The Explorers Clubimi Fellow International-itut ilaasortaavoq. Taaguut taanna ataqqinaammik taaguutaavoq. Nunarsuarmi ilisimasassarsiorluni angalatuut ilisimatusartunullu annertuumik sunniuteqarsimasut ataqqinaammik taaguuserneqartarput. Qaffasinnerpaatut taaneqarsinnaavoq.

Ole Jørgen Knud Rasmussenitut nutaaliatut Lars-Emil Johansenimit taagorneqarpoq, taamaattorli Knud Rasmussenimit angalanerusimalluni. Issittumi Ruslandimiittumi Knud Rasmussenimiit sivisunerusumik inoqarfinniittarnikuuvoq.

Ilisimasassarsiorluni angalasarnermini inuit naapitami oqaluttuaannik immiussai ilisimatusartut arlaata ilisimatusaatigalugit tusarnaarumaarai neriuutigineqaannarsinnaavoq.

Ole Jørgen issittormioqatigiinni attaveqarfippassuaqarpoq, aamma Issittumut nunallu inoqqaavinik soqutiginnittunik.

Facebookimi quppernerani novembarip arfineq-aappaanni inuulluaqqusisut imaaginnavipput.

Amerikamiu erinniortoq Lera Auerbach taakku ilagaat. Ole Jørgenilu marluullutik librettomik erinniorsimapput Flight of the Angakkok (angakkup ilimmarnera, aaqq.) taallugu. Tassani issittormiut ilisimasaat anersaallu oqaasii aallaavigalugit sanaajulluni.

Ullormi toqquiani Lera nipilersoqatigiissuit aqutsisuuffigalugit erinniartik Flight of the Angakkok Ole Jørgen nipaa, illarnera anersaavalu erinniamut tunngatillugu, ataqqinnilluni eqqaaniutitut tusarnaartitsissutigaa. Leipzigimi naggueqatigiit Inuit ulluanni Ole Jørgen Hammeken Tysklandimi eqqaaniarlugu tusarnaartitsisoqarpoq.

Inooqatini Galya Morrel, ernini Ludvig, panini Pipaluk, ernuttanilu Lucaeh kiisalu qatanngutini Esther aamma Ane Sofie toqukkut qimappai.

Ole Jørgenip eqqaaneqarnera ataqqinartuuli.

Ilaqutaasut.