Nerisassat nammineq pisat nerrivimmi sassaalliutigineqarsinnaanerat immikkut ittuuvoq. Nerisassat qaalernarnerat piinnarnagu aammali kinaassutsimik, suminngaanneernermik qanorlu inuuneqarnermik ersersitsisarnerat pillugu.
Taamatut misigineq Inuit Nunaat tamakkerlugu atuuppoq — Alaskamiit Canadamut, Kalaallit Nunaanniit Tjukotkamut. Tamanna ICC-p Iqalunni ataatsimeersuarnerani erserpoq, tassanilu sumiiffinni taakkunani sisamanit aallartitat piniarneq inuussutissallu isumannaatsuunissaat ilaatigut oqallisigaat.
Nerisassat nammineq pisat nerrivimmi sassaalliutigineqarsinnaanerat immikkut ittuuvoq. Nerisassat qaalernarnerat piinnarnagu aammali kinaassutsimik, suminngaanneernermik qanorlu inuuneqarnermik ersersitsisarnerat pillugu.
Taamatut misigineq Inuit Nunaat tamakkerlugu atuuppoq — Alaskamiit Canadamut, Kalaallit Nunaanniit Tjukotkamut. Tamanna ICC-p Iqalunni ataatsimeersuarnerani erserpoq, tassanilu sumiiffinni taakkunani sisamanit aallartitat piniarneq inuussutissallu isumannaatsuunissaat ilaatigut oqallisigaat.
Kalaalimerngit nerrivimmi. Kalaaliminertorneq inuppassuit piorsarsimassutsiminnut, kinaassutsiminnut peqqissutsiminnullu pingaaruteqartippaat.
Assi: Oscar Scott Carl
- Piniarsinnaaneq nerisassanillu nammineq pissarsisinnaaneq pisinnaatitaaffittut qitiulluinnartutut isigaarput, Sara Olsvig, ICC-mi siulittaasuusimasoq oqarpoq.
Inuit piniarsinnaatitaanerat tassaaginnanngilaq qaqqamut immamulluunniit angalaarnissamut periarfissaqarneq. Aammali pinngortitamit najugarisamit inuussutissaqarsinnaaneq pineqarpoq.
Piniarsinnaatitaagaannili aamma uumasunik aalisakkanillu pinigassaqartariaqarpoq.
Sara Olsvig naapertorlugu siunissami aamma piniagassaqaqqullugu Inuit Nunaat tamakkerlugu piujuartitsilluni piniartarneq Inuit kissaatigilluinnarpaat.
- Tamanna ilaatigut Canadami Inuit aalisarnerup piniarnerullu piujuartitsisumik ingerlanneqarnissaat sulissutigaat.
Ajornartorsiut sumiiffiit ilaanni erseqqissilereerpoq.
Alaskami kuussuarmi Kuskokwimi kapisillit ikiliartupiloorsimapput. Tamannalu inuiaqatigiinnut kapisilinnik inuussuteqartariaqartunut sunniuteqangaarsimavoq.
- Silaannaap allanngoriartornera aalisarnerillu assigiinngitsut, soorlu niuernikkut aalisarneq, pissutaasinnaasut misissorneqartut ilagaat, ilisimatuulli sooq ikiliartornersut paasiniarlugu suli suliuarsinnarput, Sara Olsvig oqarpoq.
Uumasut aalisakkallu pillugit aqutsinermi oqimaaqatigiissaarinissaq taamaammat pingaaruteqarpoq. Piniagassat piniarneqarsinnaassapput, taamatuttaarli piniagassat siunissaq ungasinnerusoq eqqarsaatigalugu tammassanngikkunik illersorneqartariaqarput.
Pinngortitaq allanngoraangatUumassusillit ataasiakkaat kisimik isumakuluutigineqanngillat. Sara Olsvig naapertorlugu silap pissusiata allanngoriartornerata Inuit Nunaat tamakkerlugu uumasut assigiinngisitaarnerinut pinngortitamilu ataqatigiinnermut sunniutai isumakuluutigineqarput.
- Silap pissusiata allanngoriartuinnarnera siunissami qanoq sunniuteqassava? Uumasut assigiinngisitaarnerat inuunitsinnut pingaaruteqartoq allanngussaaq. Tamanna uagutsinnut qanoq kinguneqassava? Sara Olsvig aperaaq.
Issittup imartaata qeqqani 2040-p tungaanut aasakkut sikuerluinnartalernissaanik ilimasaarut ataatsimeersuarnermi sammineqartut pingaarnerit ilagaat.
Pinngortitaq, piniarneq inuunerlu Kalaallit Nunaanni imminnut atalluinnarput.
Assi: Oscar Scott Carl
Inuit sermeq kisiat soqutiginngilaat, aammali uumasut sermimik inuussutiginnittut soqutigivaat.
- Tamanna uumasunut uumassusillillu avatangiisaasa ataqatigiinneranut qanoq isumaqarpa? Tamakkuupput Inuit apeqqutigisartagaasa ilaat, Sara Olsvig oqaluttuarpoq.
Ullumikkut sikup annikilliartornera piniartunut aalisartunullu sunniuteqareerpoq. Siku allanngoraangat piniarfinni atukkat aamma allanngortarput. Tamannarpiaq pissutigalugu ICC-p silap pissusiata allanngoriartornera nunarsuullu ataqatigiinnera aqqutigalugu mingutsitsneq uumasunut piniakkanut apuuttartoq soorlu plastikki, kviksølvi avatangiisinullu mingutsitsisut allat nunani tamalaani suleriutsit ICC-p peqataaffigisani aqqutigalugit akiorpaa.
Pinngortitarlu allanngoraangat qanoq pitsaanerpaamik paasineqarsinnaanersoq aqunneqarsinnaanersorlu apeqqutaalertarpoq.
Kinguaariinni ilisimasat Matumani Inuit namminneq ilisimasaat pingaaruteqarluinnarput.
Piniarnermut aalisarnermullu tunngatillugu aalajangiiniaraanni Inuit kinguaariikkuutaani ilisimasaat eqqarsaatigineqarnersut ataatsimeersuarnermi oqallisigineqarpoq.
Inuit Nunaat tamakkerlugu unammillernartut assigiikkaluartut politikkikkut aaqqissuussinerit assigiinngitsorujussuupput.
- Kalaallit Nunaanni piniarnermut aalisarnermullu tunngatillugu taakkununnga sanilliulluta qanoq oqartussaassuseqartigisugut eqqaasinneqarpugut, Sara Olsvig oqarpoq.
Piniagassat nerrivimmiileraangamik ileqqunut ataatsimoornernullu kinguaariikkuutaani kingornuttakkanut aamma ilaasarput.
Assi: Oscar Scott Carl
Nunatsinni aalisarnermut piniarnermullu tunngasut amerlanersaat Inatsisartunit Naalakkersuisunillu aqunneqarput.
- Canadami, Alaskami Tjukotkamilu pissutsit allaanerupput. Immaqa sumiiffiit ilaanni tamat naalakkersueqataanerat atuuppoq, aalisarnermulli piniarnermulluunniit tunngatillugu tamakkiisumik aalajangiisinnaatitaasoqarneq ajorpoq, Sara Olsvig oqarpoq.
Uumasut pinngortitarlu, inuiaqatigiit inuussutissaat, pillugit aalajangiisoqaraangat Inuit ilisimasaasa ilanngunneqartarnissaat Sara Olsvigip pingaartippaa.
Nerisassaannaanngitsut Aamma pisat nerrivimmiileraangata qanoq pisoqartarnersoq eqqartorneqarpoq.
Sara Olsvig naapertorlugu Inuit Nunaat tamakkerlugu assigiissuteqartut allat tassaasut nerisassat nalinginnaasut pisariaqartinneqarnerat. Kulturi kinaassuserlu kisimik pineqanngillat, aammali peqqissuseq pineqarpoq.
- Nerisassagut piniarsinnaasariaqarpagut. Nerisassagut qanoq uagutsinnut peqqinnartiginersut nalunnginnatsigit pisariaqartippagut. ICC peqqissutsimut ataatsimiititaliaqarpoq, taakkualu sulinerat aqqutigalugu nerisassat ileqqutoqqat peqqissutsitsinnut qanoq pingaaruteqartiginerat paasisimanerulerparput, taanna oqarpoq.
Sara Olsvig naapertorlugu ileqquusumik nerisassaatigut allanik taarserneqarpata kinguneri malugineqarsinnaapput.
- Nerisassagut allanik taarserneqarpata Inuit amerlanerusut diabeteseqarnermik nappaatinillu allanik nappaateqalertarput. Nunani Issituumiittuni allani aamma taamaappoq, taanna oqarpoq.
Aalisartut marluk saarullinniartut. Aalisarneq pingaarutilittut nerisassarsiorfiullunilu Kalaallit Nunaanni immap qanittuani inuunermut ilaavoq.
Assi: Oscar Scott Carl
Taamaammat piniarnerup inuussutissat isumannaatsuunerannut, peqqissuunermut piorsarsimassutsimullu pingaaruteqarnera erserpoq.
Taamaammat uumasut qanoq amerlatiginerat apeqqutaaginnarnani aammali Inuit taakkuninnga inuussutissarsiorsinnaanerat apeqqutaavoq. Aamma Inuit piniakkamik inuussutigiinnarnissaannut periarfissaqarnersut apeqqutaavoq.
Oqimaaqatigiissaarinissaq Alaskamiit Canadamut, Kalaallit Nunaanniillu Tjukotkamut nunap pissusia inatsisillu assigiinngillat. Namminerli nerisassanik piniarsinnaarusunneq, piniarnerup tulluusimaarutigineqarnera piorsarsimassutsikkullu naleqartitat assigiipput.
Uumasut pinngortitallu ataqatigiinnera Inuit inuussutigisaat illersorniarlugit aammali kiffaanngissuseq pisinnaatitaaffiillu piniarnermut attuumassuteqartut qulakkeerniarlugit oqimaaqatigiissaarinissaq unammillernartuuvoq.
Pisassiissutit piujuartitsisumillu aqutsineq aalisakkat illersorniarlugit pisariaqarsinnaapput. Tamannali peqatigalugu Inuit kinguaariit ingerlaneranni ilisimasaat ataqqineqartariaqarlutillu aalajangiinermi ilanngunneqartarriaqarput.
- Oqimaaqatigiissitsineq tamana qanoq nanissavarput? Tamanna immaqa sulissutigisariaqakkatta pingaarnerpaartaasa ilagaat, Sara Olsvig oqarpoq.
Ullumikkut qanoq piniartoqarsinnaanera apeqqutaaginnanngilaq.
Taamaaliornikkut kinguaariit tulliuttut aamma pisaminnik angerlaassisinnaallutillu nerisinnaasaqarnissaat qulakkeerneqartarpoq.
