PINEQATISSIINERMI PIFFISSAP SIVISUNERPAAFFISSAA SIVITSORNEQARTOQ
Akuerineqarnera nuannaarutigineqartoq – susassaqarfik angerlaannialersaarneqalerpoq
Pineqaatisseeriaatsip sivisunerpaaffia ukiunik quliniit 16-inut sivitsornissaa Folketingimi akuersissutigineqarpoq. Naalakkersuisut eqqartuussiveqarnermut tunngasuni aqqiissusseqqinniarput, pinerluttulerinermut inatsisit angerlaanneqassallutik, taamaalilluni siunissami allannguutit Inatsisartunit kisimi suliarineqarsinnaalissallutik.
- Eqqartuussiveqarnermut tatiginninneq attanneqaannassappat, eqqartuussiviit iliuusereriikkanut kingunerititaasa aamma eqqugaasut inuiaqatigiillu naapertuilluartoqarneranik isiginninnerisa akornanni ataqatigiittoqassaaq, Naaja H. Nathanielsen (IA) oqarpoq.
Assi: Oscar Scott Carl
Naalakkersuisut tamanna pillugu danskit naalakkersuisuinut 2018-imi decembarimi kissaatigalugu saaffiginnissutigeqqaarpaat, maannalu tassa akuerineqarpoq.
Eqqartuussiviit pineqaatissiisarneranni ukiut amerlanerpaaffissaat quliniit 16-inut qaffannissaat Folketingimi sisamanngornermi akuersissutigineqarpoq. Allannguutit 2026-mi januaarip aallaqqaataani atuutilissapput.
Tamanna naalakkersuisup Naaja H. Nathanielsenip (IA) nuannaarutigaa:
- Pinerluttulerinermi inatsisip ineriartornermut malinnaanissaa, tamatsinnut pingaaruteqarpoq. Eqqartuussiveqarnermut tatiginninneq attanneqaannassappat, eqqartuussiviit iliuusereriikkanut kingunerititaasa aamma eqqugaasut inuiaqatigiillu naapertuilluartoqarneranik isiginninnerisa akornanni ataqatigiittoqassaaq, tusagassiuutitigut nalunaarummi oqarpoq, nangipporlu:
- Kisianni ukiorpassuarni qummut killiliussamit sivisunerpaamik ukiunik 10-nik sivisussuseqartumit eqqartuussiviit killilerneqartarsimapput. Qallunaat ministeriisa taarseraattuartut ataanni kalaallit kissaataasa akuersorneqarnissaata pilersinneqarnissaa ukiunik arlalinnik sivisussuseqarsimavoq, taamaammallu ulloq una pitsaasuuvoq, tassani siunnersuut inaarutaasumik akuersissutigineqarpoq.
Pinerluttulerinermut susassaqarfik angerlaakkusukkaa
Eqqartuussiveqarnerup aaqqissuuteqqinnissaa Naalakkersuisut suliarigaat aamma paasissutissiissugaa. Pinerluttulerinermut tunngasunut susassaqarfik angerlaanneqassalluni.
- Tamanna iluatsissappat, siunissami pinerluttulerinermi inatsisip allanngortinneqarnerisa suliarineqarnissaat Inatsisartut kisimik aalajangertassavaat.
- Aaqqissuusseqqinneq politikkikkut partiit qanittumik oqaloqatigalugit aamma soorunami innuttaasut ilanngunneqarnerisigut pissaaq. Eqqartuussiveqarneq tamat oqartussaaqataaneranni sukarsuummat atatitsisoq, aaqqissuusseqqinnerup politikikkut innuttaasunillu atituumik tapersersorneqarnissaa Naalakkersuisut anguniassavaat, Naaja H. Nathanielsen oqarpoq.
Kalaallit Nunaanni eqqartuussiviit pinerluttunillu isumaginnittoqarfik danskit naalagaaffiannit ingerlanneqarlutillu aningaasalersorneqarput, allannguutissallu Danmark suleqatigalugu pissapput.
Pineqaatissinneqarnikut inissaqartinneqarniarnerannut ajornartorsiut aaqqiiviginiarlugu, pineqaatissinneqarsimasunut inissiisarfinni 70-inik nutaanik inissanik sanaartornissaq Danmarkip Naalakkersuisullu qanittukkut isumaqatigiissutigaat.
