Peqquserlulluni allagaasiorneq peqquserluutillu pillugit suliaq, Qeqqata Eqqartuussisoqarfiani nassuernertut suliarineqartoq, sisamanngornermi nalunaaqutaq 11.00 missaani naammassineqarpoq.
Pineqartup unnerluussutit nassuerutigai, ukiumilu ataatsimi qaammatinilu arfinilinni pineqaatissinneqarsimasunut inissiisarfimmiittussanngortinneqarluni.
Peqquserlulluni allagaasiorneq peqquserluutillu pillugit suliaq, Qeqqata Eqqartuussisoqarfiani nassuernertut suliarineqartoq, sisamanngornermi nalunaaqutaq 11.00 missaani naammassineqarpoq.
Pineqartup unnerluussutit nassuerutigai, ukiumilu ataatsimi qaammatinilu arfinilinni pineqaatissinneqarsimasunut inissiisarfimmiittussanngortinneqarluni.
Eqqartuussivimmi nalunaaqutaq qulingiluanut suliaq aallartimmat unnerluutigineqartoq qaqortumik takisuunik talitalimmik kiateqarluni qernertunillu qarleqarluni takkuppoq. Politiinit marlunnit ilagineqarpoq. Unnerluutigineqartoq, kommunimi pisortaasimasoq, januaarimili 2025-mi tigummigallarneqalerpoq.
Unnerluussisoq illersuisorlu Nuummiit nittartakkatigut videokkut peqataapput. Suliarlu nassuertoqarnera tunngavigalugu eqqartuussinerummat, eqqartuussisoq eqqartuusseqataasunik ilaqarani kisimiippoq.
Unnerluutit nassuerutigineqartut
Eqqaaneqareersutut pasisaq 2020-mi marsip qaammataaniit 2024-mi novembarip tungaanut USA-mi suliffeqarfimmiit piviusuunngitsumiit akiligassanik nassiussisarsimavoq.
Eqqartuunneqartup taakku nassuerutigai. Kommunip ukiut ingerlaneranni 3,7 millionit koruuningajaat Amerikami kontomut, unnerluutigineqartup eqqartuussivimmi nassuiaataa naapertorlugu nammineq kontominut, akiliutigai.
Akiligassiissutigineqarsimasutut allagartat saqqummiunneqartut ilagaat serverimut atuisinnaatitaanermut akiliut 17.500 dollarinik nalilik, taassumalu ataatungaani atsiornerit marluk takuneqarsinnaapput — ataaseq unnerluutigineqartup nammineq atsiornera aappaalu suleqataata atsiornera. Atsiornerulli aappaa unnerluutigineqartup suleqatimi atsiornera ilaarlugu allassimallugu nassuerutigaa.
– Peqquserlullunga allakkiorpunga. 2020-p aallartinnerani aallartippunga. Akiligassat kommunip systemianut nassiunneqartut akilerneqarnikuupput. Qeqqata Kommunia akiliinikuuvoq, unnerluutigineqartoq nassuiaavoq.
- Pisumut attuumassuteqanngitsoq
Unnerluutigineqartoq suleqatini pisumut attuumassuteqanngitsut oqarpoq:
- Taanna (sulisoq, aaqq.) tamatumunnga attuumassuteqanngilaq. Attuumassuteqanngiivippoq.
Peqquserlulluni qassinik akiligassiisimanersoq unnerluussisussaatitaasup aperimmani ima akivoq:
- Immaqa 27-t. Allagaatilli unnerluussutit naapertorlugit 26-upput.
- Qeqqata Kommunia 3,6 millionit koruuninik peqquserluffigaajuk?, unnerluussisussaatitaasoq aperivoq.
- Aap, unneqqarilluni akivoq.
Peqqissimissutigerujussuaraa
Eqqartuussinermi unnerluunneqartoq qissaserpoq, oqarlunilu:
- Taamaaliorsimasussaanngikkaluarpunga. Akueriuminaatsippara, allanngortissinnaanngilarali taamaalioqqinngisaannassaangali. Akiitsukka akilerniarlugit sulingaassaanga.
Unnerluussisoq illersuisorlu: Suliaq ilungersunartoq – unnerluutigineqartorli suleqataaruppoq
Unnerluussisussaatitaasoq oqaaseqaammini pisoq ilungersunarlunilu annertusoq oqarpoq. Tassa pisortat aningaasaataannik atornerluinerummat:
- Inuiaqatigiit akileraartartut aningaasaataannik taamatut atuineq akuerineqarsinnaanngilaq. Inatsisinik sakkortuumik unioqqutitsineruvoq.
Unnerluussisussaatitaasup ukiuni marlunni pineqaatissinneqarsimasut inissiisarfianniittussanngortitsinissaq piumasaraa.
Illersuisup Jannik Isidorip oqaaseqaammini suliap misissuiffigineqarnerani unnerluutigineqartup tatiginarluni, suleqataarusussuseqarluni unneqqarillunilu pisimanera eqqaavaa.
Ukiumi ataatsimi qaammatinilu arfinilinni pineqaatissinneqartoq – pigisaanillu arlallinnik arsaarneqartoq
Eqqartuussisoq minutsit qulit 15-illu missaanni eqqarsareerluni ima aalajangerpoq:
- Unnerluunneeqartumut ima pineqaatissiissoqassaaq: Ukiup aappaa avillugu pineqaatissinneqarsimasunut inissiisarfimmiittussanngortinneqarpoq.
Aammattaaq eqqartuussivik ima aalajangerpoq:
- biilit marluk, ATV-t ataatsit qamuteralaallut ataatsit arsaarinnissutigineqassapput
- 144.662,26 koruunit kiisalu amerikamiut aningaasaataat 75.000 dollarit arsaarinnissutaassapput
- unnerluutigineqartup Qeqqata Kommunianut 3.690.813,24 koruuninik taarsiissaaq
Unnerluutigineqartup eqqartuussut akueraa. Taassuma tigummigallarneqarnera attatiinnaqqullugu unnerluussisussaatitaasoq piumasaqanngilaq, taamaammallu angut eqqartuussineq naammassimmat iperagaavoq.
