Nukissiorfiit: Sarfaarunnermi ima pisoqarpoq
Nuummi weekendimi sarfaarummat pilersuineq tamakkiisunngoqqinnissaanut akunnerit arfinillit atorneqarput. Nukissiorfimmi sulisut 20-ngajaat kajummissutsiminnik suliartukaasimapput.
- Qamittoornermi Utoqqarmiut Kangerluarsunnguani arfininngornermi sakkortuumik assarnernera peqqutaatinneqarpoq, tassani aqqutit marluk imminnut qanillivallaarlutik qamittoortitsisimammata, Nukissiorfiit tusagassiuutitigut nalunaarummi allapput.
Assi: Nukissiorfiit
Nuummi piffissap nalorninartorsiorfiup nalaani arfininngornermi januaarip 24-ani akunnerit arfinillit sarfaaruppoq.
Anorlingaatsiarnera qujanartumik tamatumunnga pissutaavoq. Nukissiorfiit qamittoornermi qanorpiaq pisoqarsimanera pillugu tusagassiuutitigut nalunaaruteqarput.
- 22:35 – Nuuk tamarmi sarfaaruppoq
- Kinguninngua – Ajoqummik misissuineq aallartinneqarpoq, imermik nukissiorfik pinartoqartillugulu sarfaliuutit aqqutigalugit attavinitsitseriaanerit
- 00:30 – Pinartoqartillugu innaallagissamik nukissiorfimmit pilersuineq aallartinneqassasoq. aaliangiunneqarpoq
- 04:30 – Nuuk tamarmi sarfaneqqippoq pinartoqartilluglu innaallagissamik nukissiorfimmit utaqqiisaasumik pilersorneqarluni
- Sapaat nal. 13:57 – Nuuk 100 %-mik imermik nukissiorfimmit pilersorneqaqqilerpoq
- Qamittoornermi Utoqqarmiut Kangerluarsunnguani arfininngornermi sakkortuumik assarnernera peqqutaatinneqarpoq, tassani aqqutit marluk imminnut qanillivallaarlutik qamittoortitsisimammata.
- Ajoqutinik misissuinitta ajoqut Amerallip kangerluaniinngitsoq takutippaa, Nukissiorfiit allapput.
Nukissiorfiit sulisuisa attaveqaatit aqqutaat ataasinngornermi ulloq 26. januaari nakkutilliivigaat. Nakkutilliineq ajoqutinik takussutissaqaranilu atortulersuummi ajoqummik takussutissaqanngilaq.
Kajumissutsiminnik suliartortut
Pinartoqartillugu innaallagissamik pilersuut qaffakkiartuaartartoq Nukissiorfiit allapput.
- Pinartoqartillugu innaallagissamik nukissiorfitsinni sisamanik motooreqarpugut, pineqartullu tulleriiaartillugit aallartinneqartarput. Illoqarfik tamakkerlugu ataatsikut pilersorneqaleqqissinnaaneq ajorpoq, tamanna motooriutitsinnut artornarpallaarluni sapernarmat.
Sillimasut tamarmik minutsit 20-t ingerlaneranni apuupput. Pilersuinerlu piaarnerpaamik aallartinneqaqqinniassammat sulisut 20-t namminneq kajumissutsiminnik ornigullugit ikiuukkiartorlutik.
- Sarfaarunnerit ilinniarfiujuaannarput, uanilu nalilersuinermi aamma ilanngunneqassapput, taamaasilluta siunissami pilersuinermut isumannaallisaaneq pitsanngorsaavigineqarniassammat.
Nuummi sarfaarunneq sivisuneq kingullermi 2024-mi decembarimi pivoq, tassani ulloq ataaseq sinnerlugu qamittooqqasoqarluni. Utoqqarmiut Kangerluarsunnguaniit aqqut ajoqutilit qamittoornermi tassani pissutaavoq.
