Sermersooq: Ittoqqortoormiini nalliuttorsiorneq Nuummilu atuarfiit pillugit ajornartorsiutit

Avaaraq Olsenip ukioq qinersigatta Kommuneqarfik Sermersuumi borgmesteritut ingerlaqqittup ukioq naalersoq kingumut qivialaarpaa.

– 2025 immikkuullarissuuvoq, qinersiviuvormi. Qinersinitta kingorna kommunitsinni illoqarfiit tamaasa tikeraarpakka, tikeraarnikkalu nuannersumik eqqaamavakka. Ingammik Ittoqqortoormiit ukiuni 100-nngortorsiornerani tikeraarnerput immikkut eqqaarusunnarpoq, Avaaraq Olsen oqarpoq.

Borgmesteritut ilinnut suna ukioq manna unammillernarnerpaava?

- Qinersinerit ulapinnartuaannarput, politikkikkummi sulingaatsiartariaqarpugut. Aamma kommunalbetyrelsemi ilaasortat imminnut ilisareqatigiinniarnerat piffissartorfiusarpoq. Nukiit nutaat peqataalerneri pissanganartuuvoq, isumaqarpungalu inissilluartugut - naak ilimaginngisatsinnik pisoqaraluartoq, ingammik meeqqat atuarfii eqqarsaatigalugit. Taakkumi ukkataringaatsiarnikuuagut. 

Nuummi atuarfiit pillugit ajornartorsiutit borgmesterimut initungaatsiarsimaneri tupaallannartuunngilaq. USK-imi ASK-ilu oqoqarneri peqqutaallutik matuneqarmata  atuartut Nuup illoqarfiata immikkoortuini pingasuni sumi tamani maanna siaruarsimallutik atuartinneqarput.

- Nuummi atuarfitsinni ajornartorsiutit assigiinngitsut initupput, kisianni isumaqarpunga suleqatigiikkusussuseqarluartoqarmat ajunngitsumik ingerlariaqqilluta, borgmesteri oqarpoq. 

Nunaqarfiit sanaartukkallu 

Suliassani suut ukioq manna angumerinngitsoorsimanerlugit Avaaraq Olsen aperineqarami nunaqarfinnut amerlanernut tikikkusussimagaluarnini eqqaavaa.

– Nunaqarfiit amerlanerusut ukioq manna tikikkusukkaluarpakka. 2026-mi suliassani pingaarnersiuininni salliutitassannut qilanaarutissannullu ilaapput, kommunimimi sumiiffiit tamarmik uannut pingaaruteqarput. 

- Sanaartortitsivuguttaaq - ingammik Nuup avataani - neriuutigisaraluatsitut killiffeqanngitsunik. Tassungali killinneq assigiinngitsunik peqquteqarpoq, sulisussat piffissarlu amigaatigineqarput, aamma suliarinnittussarsiuussinerit sivisunerusarput. Ukiumi aggersumi taakkua ajunnginnerusumik suliariniassavagut, Avaaraq oqarpoq.

Akisussaaffiit utertiortorneqassapput 

Avaaraq Olsen Kommuneqarfik Sermersuumi 2022-mi borgmesterinngortoq, apriilip aallaqqaataani qinersinerup kingorna atuuffimminiiginnarpoq. Taamaalilluni 2029-mi qinersinissap tungaanut borgmesteriusussanngorluni.

- Borgmesteritut ingerlaqqinnera imminermini angusaavoq iluatsittoq. Tatiginninneq uannut takutinneqartoq qujamasuutigisorujussuuara. Aningaasanut missingersuut pillugu kommunalbestyrelse katersuussinnaammat tulluusimaarutigisannut ilaavoq.  Akisussaaqatigiilluta aningaasanut missingersuut katersuuffigigaangatsigu uagutsinnut, aammali kommunip innuttaasuinut ajugaanertut taaneqarsinnaasarpoq. 

Kommunerisarni aappaagu 2026-mi suna pingaarnertut suliniutigerusuppiuk?

- Akisussaaffiit utertitsiortornissaat ukkatarerusuttorujussuuara, taamaaliornikkut kommunitsinni ineriartortitsinissaq qulakkeerneqarsinnaavoq. Inoqarfitsinni tamani siuariartortoqarnera innuttaasut malugisinnaasariaqarpaat. Naligiinnerusumik atugaqartitsiumalluta sullissineq pitaanerusoq periarfissallu amerlanerusut kommunitsinni tamani sulinerput aamma nangeqqissavarput, Avaaraq taama naggasiivoq.