SIUNNERSUUTIT 2.013-IT TIGUNEQARTUT
Air Greenlandip timmisartussaa atserneqartoq
Timmisartortitseqatigiiffiup timmisartussaa Airbus A320neo atserneqarpoq - 'Unaaq'. Innuttaasut siunnersuutaanniit naliliisartut atermik toqqaapput.
Naliliisartut atermik toqqaasut. Taakku tassaapput Air Greenlandip siulersuisuni siulittaasoq Malik Hegelund Olsen, Avannaata Kommuniani borgmesteri Lars Erik Gabrielsen, Kalaallit Atuakkiortut siulittaasuat Juaaka Lyberth, Visit Greenlandimi Destination Development Manager Linda Kleist, Greenland Airportsimi sulisoqarnermut pisortaq Stina Damgaard kiisalu Air Greenlandimi sulisut marluk – Flight Operation Assistant Ciga H. Rydberg aamma nakkutilliisoq Aviâja Møller.
Assi: Air Greenland
Air Greenlandip timmisartussaata nutaap Airbus A320neop atserneqarnissaanut soqutiginnittoqarsimaqaaq.
Timmisartup nutaap atissaanut siunnersuutit 2013-it tunniunneqarsimasut, timmisartortitseqatigiiffik allappoq. Atissaalu naliliisartunit toqqarneqarluni.
Air Greenland timmisartup ukiuni arfinilinni attartornissaanut isumaqatigiissuteqartoq siusinnerusukkut nalunaarutigineqarnikuuvoq, taannalu maanna Unaamik atserneqarpoq.
- Taama annertugisumik tapersersorneqarnitsinnut siunnersuutinullu tunngavilersorluakkanut qujamasoqaagut. Matumani erseqqisssarneqarpoq Air Greenland Nunatsinnut tamarmut qanoq pingaaruteqartigisoq – taaguutissaalu qanoq pingaartinneqartiginersoq, Air Greenlandimi pisortaaneq siunnersuutinik naliliisartunut ingerlatitseqqiisoq Jacob Nitter Sørensen oqarpoq.
Ateq toqqagaq inuit 78-it siunnersuutigisimagaat, Air Greenlandip siulersuisuini siulittaasoq Malik Hegelund Olsen oqarpoq.
- Taaguut Air Greenlandip timmisartuinut allanut timmisartullu atuuffissaanut tulluarpoq taaguut atituumik paasillugu. Tamanna video taaguummik saqqummiussisoq takugaanni paasinarsissaaq, siulersuisuni siulittaasoq oqarpoq.
Timmisartoq 2027-mi atulernissaa naatsorsuutigineqarpoq.
Ateq sooq taanna toqqarneqarsimanersoq Air Greenlandip videomi uani nassuiaatigaa:
