Amerlanerussuteqartut Nuummi ilisarnaat nutaaq akueraat
Nuummi ilisarnaat millionilikkaanik akilik innuttaasunit akerlerineqaraluartoq Kommuneqarfik Sermersuumi kommunalbestyrelsimi amerlanerussuteqartut ilisarnaat piviusunngortinneqassasoq qularutiginngilaat.
Nuummi ilisarnaammut nutaamut Bilo Høegh Stigsenip siunnersuutaa ajugaavoq. Ilisarnaat “Sermitsiap Qilaataa”-nik ateqarpoq.
Assi: Kommuneqarfik Sermersooq
Kommuneqarfik Sermersuumi kommunalbestyrelsimi Siumut kisiartaalluni innuttaasunit siunnersuutigineqartoq una tapersersorpaa: “Suliniut ‘Nuup ilisarnaatissaa’ unitsilli – Sermitsiaq ilisarnaatigereerparput”.
Innuttaasut siunnersuutaat 250-init amerlanerusunik atsiorneqarpoq, taamaattumillu kommunalbestyrelsimi politikkikkut oqaluuserineqartussanngorluni.
5 millionit koruunit immikkoortinneqartut
Inuit Ataqatigiit, Demokraatit Naleqqallu akerlilersuisoqangaaraluartoq qularatik 5 millionit koruunit immikkoortinnissaannut piareersimapput. Aningaasat ilisarnaatissamut atorneqartussaapput.
Kommunalbestyrelsimi ikinnerussuteqarnerup kingorna Siumumi politikeri Doris J. Jensen Facebookimi ima allappoq:
- Eqqumiitsuliorneq akerlerinngilara kisianni mamiagaara nunaqarfimmiluunniit soorlu Arsummi ilinniartitsisup illussaanik sananissaq akissaqarfiginagu Nuummi eqqumiitsuliorniarmata 5 mio. kr-nimik nalilimmik!
Kusassaat
Borgmester Avaaraq Olsen aalajangiinerminik ima nassuiaasoq KNR-imit allaaserineqarpoq:
- Nutaamik ilisarnaateqalernissaq pineqanngilaq, illoqarfimmili kusanarnerulersitsinissaq pineqarpoq.
Ilisarnaat eqqumiitsuliarluunniit. Illussanik titartaasartoq Bilo Høegh Stigsen unammisitsinermut 250.000 koruuninik akissarsiassartalimmi ajugaasuuvoq.
Soorlu Sermitsiap siusinnerusukkut allaaserisaani “Sermitsiap Qilaataa” Sermitsiamut eqqumiitsuliatut titartaariaatsimullu nersorinnissutaavoq, Kalaallit Nunaanni illoqarfiit pingaarnersaannut ilisarnaatitut kinaassutsitullu. Suliniummi kalaallit qilaataat Qilaat ammalortuulluni qaqqap tungaanut tikkuaqqasoq isumassarsiorfiuvoq.
