Borgmesteri suliakkiimmat inatsit malinneqanngitsoq

Avannaata Kommuniata Ilulissani puttasoqarfissap eqqaani, Itisuarsummi, tummeqqiortitsinermini Inatsisartut inatsisaannik, nunaminertamut atuinermut tunngasumik malinnissimannginnini sumik peqquteqarnersoq ilaannakortumik maanna nassuiarpaa.

- Uani suliami borgmesterimit (Lars Erik Gabrielsen (S), aaqq.) peqquneqarsimavugut tummeqqat sananeqarnissaat aallartinneqassasoq. Kommunimi politikkikkut aqutsisuni qaffasinnerpaamik inissisimasumit erseqqissumik peqqussutigineqarmat suliaq aallartinneqarpoq, teknikkimut ingerlatsivimmi pisortaq Sermitsiamut allakkatigut akivoq.

Taama akinermini Sermitsiap apeqqutai tamaasa akinngilai. Sermitsiammi apeqqutit akitikkusutani ukua Avannaata Kommunianut nassiuppai: 

Qanoq ililluni kommuni sanaartornermik aallartitsisinnaava nunaminertamik akuersissut suli akuerineqaranilu tunniunneqanngitsoq? Kommuni isumaqarpa nunaminertamik suli pissarsinani sanaartorluni aallartinneq inatsisinik atuuttunik malinninnerusoq? Taamaassimassappat inatsit suna tamatumunnga tunngaviua?

AAMMA ATUARUK:

Kommuni suli akuersissuteqarani tummeqqiorluni aallartittoq

Kommuni: Inatsit malissallugu pisussaaffeqarpugut

Avannaata Kommuniata inatsimmik malinninnginnini toqqaannartumik nassuiarumanngilaa, borgmesterili suliakkiimmat taama pisoqartoq taamaallaat nassuiarneqarpoq. Naak suliami uani inatsimmik malinninngikkaluarluni suliaqarnerni tamani inatsisinik malinnittussaatitaanini kommunip erseqqissarpaa.

- Kommuni allattoqarfillu inatsisinik atuuttunik malinninnissaminut pisussaaffeqarpoq, uani suliami pilersaarusiornermut nunaminertanullu Inatsisartut inatsisaat aamma pineqartillugu. Kommunip nittartagaani paasissutissat suleriutsillu saqqummiunneqartut tamanut atuutsinneqarput, teknikkimut pisortaq allappoq.

Suliakkiutit borgmesterimeersut inatsisinit atuuttunit, Naalakkersuisoqarfimmit nassuiarneqareersunit, pingaarnerutinneqassanersut pillugu itisileeqqusissummik kommunimut paasiniaagaluarpugut. Itisileeqqusissutilli piffissaliussap iluani akineqanngillat.

Naalakkersuisoqarfik: Akuersisoqaqqaassaaq

AAMMA ATUARUK:

Borgmesterip kommunip tummeraliai qanoq akeqarnersut nalugaa

Aningaasaqarnermut Naalakkersuisoqarfik inatsisip atuuttup qanoq innera siusinnerusukkut nassuiareerpaa. Nassuiaanermi Ilulissani tummeqqiortitsineq toqqaannartumik oqaasertalerneqanngilaq, inatsilli atuuttoq nassuiarneqarluni issuarneqarpoq:

- Inatsimmi paragraf 37 naapertorlugu nunaminertanut oqartussaasunit akuersisoqarsimatinnagu nunaminertaq sunaluunniit nalinginnaasumik atorneqassanngilaq atorneqalissananiluunniit, aamma nunaminertanut oqartussaasunit akuersisoqarsimatinnagu nunaminertap suulluunniit atorneqarnera allanngortinneqassanngilaq, Naalakkersuisoqarfik allappoq.

Avannaata Kommunia 2025-imi decembarip naanerani Itisuarsummi tummeqqiornissamik suliakkiivoq. Nunaminertamilli atuisinnaanermut akuersissut januaarip arfineq-pingajuani 2026-imi aatsaat tunniunneqartoq, allagaatini Sermitsiap qinnuteqarluni pissarsiaani takussutissaqarpoq.