IA-p atuarfeqarnermut inatsisissatut siunnersuut nutaaq itigartippaa: Oqaatsinik ilinniartitsineq ajorseriartinneqassanngilaq

Meeqqat atuarfiannut inatsit allanngortinneqartariaqassappat tamanna eqqarsaatigilluaqqaarlugu pissaaq, tamatumunngalu atatillugu meeqqat atuarfiannut attuumassuteqartut arlallit peqataatinneqassapput, Inatsisartuni IA-mi politikerit taama isumaqarput, taamaalillutillu Ilinniartitaanermut Naalakkersuisup Nivi Olsenip (D) siunnersuutaa innuttaasuni oqallisigineqangaatsiartoq tapersersunngilaat.

IA-p Inatsisartuni ilaasortaatitaasa ataatsimeereerlutik oqaatigaat, isumaqatigiissutigigitsik kalaallisut oqaatsinik ilinniartitsineq nukittorsarneqartariaqartoq, “tamatumali kingunerissanngikkaa oqaatsinik allanik ilinniartitsinerup ajornerulersinneqarnissaa”, tusagassiuutinut nalunaarummi tamanna erseqqissarneqarpoq.

AAMMA ATUARUK

Nukarlernut ullut atuarfiusut akunnerillu ikinnerit

Inatsisissatut siunnersuummi siunniunneqarpoq, atuartut nukarliit nalunaaquttap akunneri ullullu atuarfigisartagaasa ikilisinneqarnissaat, tamatumalu kingunerisaanik fagit arlallit – ilaatigut Qallunaat aamma Tuluit oqaasii – immikkut fagiusariaqanngitsutut atorunnaarsinneqassasut. Pingaarnertut tunngavilersuutaalluni kalaallit oqaasiisa matematikillu nukittorsarneqarnissaat aamma atuartut ullup atuarfiusup ingerlanerani atuarfimminni nikittaqattaartarnerisa ikilisarnissaat siunertarineqartoq, taamaalilluni atuartut nukarliit itisiliinissaminnut piffissaqarnerulissammata.

Oqallinneq sakkortooq

Siunnersuut Sermitsiap sukumiisumik sammisimasaa innuttaasunit oqallisigineqangaatsiarpoq. Ilisimatusartut Nunatsinni Ilisimatusarfimmeersut aamma Sulisitsisut ernumassuteqarnertik oqaatigaat, isumaqaramik inatsisissatut siunnersuut inuusuttut ilinniarnertuunngorniarfinni qaffasinnerusunilu ilinniaqqinnissaminnut periarfissaannik ajornerulersitsissasoq.

Inatsisartuni IA-p ilaasortaatitaasa tusagassiuutinut nalunaarutaani, ullut atuarfiusut ikilisinneqarpata, meeqqat atuartut mikinerit sulerisassanersut isumakuluutigineqartoq aamma ersersinneqarpoq.

Sunngiffimmi siunertaqarluartunik sammisaqarneq

- Inatsisissatut siunnersuut piviusunngortinneqassappat, meeqqat angajoqqaamik sulineranni atuareernerup kingorna isumaqarluartumik sunngiffimmi sammisaqarsinnaanissaat ilinniarsinnaanissaallu qulakkeerneqassaaq. Tamanna nuna tamakkerlugu atuutissaaq illoqarfinniinnaanngitsoq, IA erseqqissaavoq.

AAMMA ATUARUK

Ilisimatusartut: Atuarfimmut inatsit nutaaq meeqqanut kinguneqarujussuassaaq

- Allannguutinut atatillugu amerlasuut suleqatigiittariaqarput, sulinerminnilu suliniummut akuutinneqartariaqarlutik. Assersuutigalugu kommunit piareersimaffigisariaqarpaat, meeqqat mikinerit sunngiffiat sivisunerulersussaammat, atuartitsinermi atortussat naleqqussartariaqarlutik, siunertaq tamanit ersarissumik oqaatigineqartariaqarpoq, aamma soqutigisaqaqatigiit amerlanerusut peqataatinneqartariaqarlutik, tamatumunngalu ilaatinneqassallutik meeqqat, angajoqqaat, atuarfinni siulersuisut sulianillu ilisimasallit tusarniaaffigineqarnissaat, IA-mi politikerit isumaqarput.

Aamma IA-p Inatsisartuni ilaasortaatitaasa arfineq-marluusut inatsisissatut siunnersuut upernaakkut ataatsimiinnermi saqqummiunneqaqqunagu, Naalakkersuisunut sakkortuumik kajumissaarutigaat.

Ilinniartitaanermut Siunnersuisoqatigiit peqataatillugit

Nunatsinni Ilinniartitaanermut Siunnersuisoqatigiit meeqqat atuarfiat pillugu inatsisissatut siunnersuutip allannguutissaanik piareersaanermut peqataatinneqartariaqartut, IA isumaqarpoq, siunnersuisoqatigiit taamaalillutik “ilisimasat tunngavigalugit” siunnersuisinnaassammata.

AAMMA ATUARUK

Sulisitsisut: Atuarfiit aaqqissuuteqqinneqarnerata atuarfiit namminersortut pisariaqartinneqarnerulersissavaat

- Kattuffiit arlallit tusarniaanermi isornartorsiuisut aamma maluginiarpavut, taamaattumik isumaqarpugut inuiaqatigiit kattuffiillu inatsisip allanngortinneqarnissaanut suliaqarnermut peqataatinnissaat allannguutissallu ilusilersorneqarnerannut peqataatinneqarnissaat pingaaruteqartoq, tusagassiuutinut nalunaarummi allassimavoq, taannalu ilinniartitaanermut oqaaseqartartup Nivi Heilmann Efraimsenip gruppi sinnerlugu nassiuppaa.

Inuussutissarsiornerup siunissaq ungasinnerusoq eqqarsaatigalugu aaqqissuunneqarnissaanut suleqataajumasoqartoq partiimit oqaatigineqarpoq.

- Meeqqat ilinniartinneqarnerat pimooruttariaqarparput paasisariaqarlugulu meeqqat atuarfiat inuiaqatigiinnut ilaqutariinnullu sunniuteqartorujussuusarmat, IA-p Inatsisartuni ilaasortaatitai arfineq-marluusut taama erseqqissaapput.