Illuatungiliuttut: Qaqugukkut borgmesteriujunnaartarnerluni ilisimatittariaqarpaatigut

Avannaata Kommuniani borgmesterip, Lars Erik Gabrielsenip (S), nammineq oqarnera naapertorlugu "borgmesterituunngitsoq" Qaanaap eqqaani Qeqertani Siorapalummilu atugassanik containerinik pisiniarnermi suliffeqarfimmut allaffissorluni isumaqatigiinniarsimanera, kommunalbestyrelsimi illuatungiliuteqataasup, Demokraatineersup, Lena Ravn Davidsenip, isoraa.

- Borgmesteri borgmesteriunngikkallartoq tusarneq ajorparput, taamaattumik taama oqarnera eqqumiigaarput. Borgmesteriunngikkallarnermini borgmesterip tullianik siullermik sulititsisartussaavoq, taama pisoqarnikuunngilaq. Tassuunakkut uparuarparput.

- Borgmesterip qaqugukkut borgmesteriujunnaartarnini uatsinnut ilisimatitsissutigisariaqarpaa. Ilumoorsinnaanngilaq uagut sattalluta qaqugukkut borgmesteriusartoq qaqugukkut borgmesteriusanngitsoq suleqatiginiassallutigu, Lena Ravn Davidsen Sermitsiamut oqarpoq.

IA: Pissusissamisooranilu tulluartunngilaq

Kommunalbestyrelsimut Inuit Ataqatigiit sinnerlugit ilaasortatuaasup, Qaanaaminngaanneersup Mikivsuk Thomassenip, borgmesterip atuuffimminit atuukkunnaartarnerminik oqarnera tulluartuutinnagulu illuatungilerpaa. 

- Soorunami borgmesteri ulloq unnuarlu borgmesteriuvoq. Taamatut oqarnera pissusissamisoortutut tulluartutullu isiginngilara. Oqippallaaqaaq ima oqassalluni "ulloq unnuarlu borgmesteriusinnaanngilanga", Mikivsuk Thomassen Sermitsiamut oqarpoq.

Atassut akuersaarnerusoq

AAMMA ATUARUK:

Borgmesteri: Borgmesterituunngitsoq kiffartuussigama

Kommunit avannarlersaanni illuatungiliuteqataasut, Atassut, borgmesterip oqaasii pillugit isorinninnginnerupput. Partiimmi siulittaasuata aamma kommunalbestyrelsimut ilaasortaasup, Aqqalu C. Jerimiassenip, oqarnera naapertorlugu qinikkatut suligaluaraanni saniatigut allanik suliaqarnerit takornartaanngillat. 

- Suliniutinut tunngatillugu oqartaruni teqqiami aappaa atillugu suliaqarsinnaalluni uanga taanna isoriffissaqartippallaanngilara, taanna Sermitsiamut oqarpoq.

Borgmesterit Naalakkersuisunullu ilaasortat ulloq unnuarlu atuuffeqarput. Kommunalbestyrelsimut Inatsisartunullu ilaasortat allaanerusunik pisussaaffeqarput. Tassuuna takusinnaanngiliuk borgmesterituunngitsoq sulisoqarsinnaanngitsoq?

- Nammineq Naalakkersuisuuninni Ilulissani takornarialerinermik suliffeqarfimmik piginneqataavunga. Aap, ulloq unnuarlu taamanikkut Naalakkersuisuuvunga kisianni aamma soqutigisakka ukua, aningaasaliiffigereernikuusakka, unitsiinnarusunnagit piginneqataassutsikka paarinikuuakka, Aqqalu C. Jerimiassen oqarpoq.

Inatsit allaqqasoq

AAMMA ATUARUK:

Napãtôk’ Gabrielsenimut: Mianersorit

Kommunit aqunneqarnerat pillugu Inatsisartut inatsisaanni allassimasoq naapertorlugu borgmesteri qinigaaffik tamaat atuuttarpoq. Tassa imaappoq borgmesteri angerlaruni imaluunniit allaffini qimakkuniuk borgmesteritut atuuffeerutiinnarsinnaanngilaq.

Tamannalu aamma Ilisimatusarfimmi ingerlatsineq pillugu ilisimatusartup oqaatigaa.

- Politikkikkut tatigineqarluni atuuffeqarneq, tassa “innuttaasunut sinniisuuneq”, atuuffimmit ulluinnarni immikkut sulinngiffeqarfigineqarsinnaanngillat, Najaaraq Demant-Poort Sermitsiamut sapaatit akunnerisa siulianni oqarpoq.

Demokraatit: Atorfilittani tatigisimanngilai

Borgmesterip nammineq oqarnera naapertorlugu containerinik nunaqarfinnut marlunnut pisiniarneq Avannaata Kommuniani ingerlatsiviup nammineq suliassarigaluarpaa. Suliarli sukkanerusumik suliarineqassappat nammineerluni allaffissornermigut tamanna naammassineqarsinnaasutut nalileramiuk aallartissimavaa.

- Teknikkeqarfiup ingerlatassarigunaraluarpaa. Kisianni uanga utaqqisinnaassutsinnut ajulaarami. Taamaammat ikiuukkusunnikuuvunga, Lars Erik Gabrielsen Sermitsiamut siusunnerusukkut oqarpoq.

Tamanna atorfilinnut, ulapaartunut, tatiginninnginnerusoq, Demokraatit aamma isumaqarput.

- Avannaata Kommuniani sulisuni, atorfilittat, tatigisimanngilai. Tatigisimannginnamigit sulinerallu arriigalugit taamaammat taamatut iliuuseqarsimavoq. Ajuusaarnarpoq Avannaata Kommuniani sulisut taamannak oqariartuutigimmagit, Lena Ravn Davidsen oqarpoq.

Sermitsiap isornartorsiorneqartoq, borgmesteri, Lars Erik Gabrielsen (S) isornatorsiutinut akinissaanik periarfissillugu attaveqarfigeqqikkaluarpaa, taannali isornartorsiutinut oqaaseqassanani Sermitsiamut allappoq. 

Illuatungiliuttut isornartorsiuisuni kisimiinngillat. Borgmesterimmi kommunimi politikkikkut suleqataata qaninnerpaap, tassa borgmesterip tulliata siulliup, Jens Napãtûp (N), borgmesterip oqaasii Sermitsiamut ataasinngornermi isornartorsiorpai. Borgmesterilu mianersornerusariaqarneranik aamma kaammattorlugu. Jens Napãtûp isornartorsiutai borgmesterip aamma oqaaseqarfigiumanngilai.