Itisuarsummi puttasunik atuineq akeqalissasoq - sikunit aserorneqarnissaat partiip ernumagaa

Ilulissani Itisuarsummi puttasoqalerpat puttasut atornerat atuisunut akeqassaaq. Tamanna Avannaata Kommuniani suleqatigiit borgmesteriutitaqartut, Siumut Naleqqallu, amerlanerussuteqarlutik tallimanngornermi akueraat.

Illuatungiliuttut, Demokraatit, Atassut Inuit Ataqatigiillu suliap teknikkimut ataatsimiititalimut suliareqqitassanngornissaa kissaatigigaluarpaat. 

AAMMA ATUARUK:

Borgmesteri inatsimmik uniuisussaanngilaq

- Suliaq teknikkimut ataatsimiititalimut illuatungiliuttut uterteqqikkusuppaat, Aqqalu C. Jerimiassen oqarpoq. 

Tamannali amerlanerussutillit malinngilaat. Taamaalilluni puttasussat Itisuarsummut qaquguugaluarnersoq inissinneqarpata atuisut atuinerminnut akiliisalissapput.

Ukiumut 775.000 koruunit

Umiatsianut angallatinullu inissat 188-it missaanniinnissaat kommunip ingerlatsiviata naatsorsuutigigaa, allagaatini Sermitsiap pissarsiaani atuarneqarsinnaavoq.

Umiatsiaaqqat 21 fodsi tikillugu takissusillit, puttasuni uninngatinnerat, ukiumut 2000 koruuninik akeqassasoq kommunalbestyrelsimi amerlanerussutillit aalajangerput. Umiatsiat 21 fodsimit 27 fods tikillugu takissusillit ukiumut uninngatinnerat 4000 koruuninik akeqassapput kiisalu angallatit 27 fodsimit 37 fods tikillugu takissusilinnut ukiumut uninngatitsineq 6000 koruuninik akeqassaaq. 

Puttasussani nakkutilliisoqassaaq, taannalu ukiumut 350.000 koruuninik kommunip aningaasartuutigisassavaa. Puttasut upernaami imaanukaannerat ukiamilu nunamut qaqinnerat kommunimut 300.000 koruuninik akeqassasoq naatsorsuutaavoq. Puttasut ukiumut aserfallatsaalisarnissaat 125.000 koruuninik akeqassagatinneqarpoq. Taamaalilluni ukiumut aningaasartuutit 775.000 koruuniunissaat naatsorsuutaavoq.

Atassut: Puttasut ikaartarfiillu aserortipallassinnaapput

Puttasoqarfissap inissisimanera, tassa Itisuarsummiinnera, Atassutip pitsaasutut nalilinngilaa.

AAMMA ATUARUK:

Kommuni suli akuersissuteqarani tummeqqiorluni aallartittoq

- Sikut tipisarfiata nalaat tummeqqiorfigineqarpoq. Iluliusat tamarmik tassunga tipisarput. Unammilligassarput nutaaq tassunga pisussaassooq. Sumiiffittaa ajoraluartumi pilersaarusiorluagaanngilaq.

- Ikaartarfiit maanna ikkuffissarilingaannut ikkunniarunik sikunit ingerlaannaq aserortilernissaat naatsorsuutigineqartariaqarpoq, Aqqalu C. Jeremiassen ataatsimiinnermi illuatungiliuttut sinnerlugit oqaaseqarnermini oqarpoq.

Borgmesteri isumassarsisoq - sulili aningaasartaqanngitsumik

Ataatsimiinnermi aqutsisoq, borgmesteri, Lars Erik Gabrielsen (S), Aqqalu C. Jerimiassenip taama oqareernerata kingorna oqaaseqarpoq.  

- Iluliusat allallu tipisartut pillugit vaajariliinissamik periarfissaqarpoq. Taassuma naammassineqarnissaanik kissaateqarumaarpugut. Aningaasartalernikuunngilarput, kissaateqarumaarpugut. Taamaalilluta iluliat anngajaarsuit isaasarnerat unitsissinnaavarput, borgmesteri oqarpoq.

Taassuma eqqartugaa tassaavoq vaajari kangerluup paatungaanut inissinneqarsinnaasoq, iluliat kangerlummut pulanaveersaartillugit.

AAMMA ATUARUK:

Borgmesterip kommunip tummeraliai qanoq akeqarnersut nalugaa

Suliaq oqallisaaqisoq

Sermitsiaq Itisuarsummi tummeqqiorneq pillugu arlaleriarluni siusinnerusukkut allaaserisaqartarpoq. Suliaq Inatsisartut inatsisaat atuuttoq naapertorlugu suliarineqanngilaq. Suliarmi nunaminertamik akuersissuteqarani aallartinneqarsimasoq Sermitsiap allagaatinik kommunimut noqqaanermini paasivaa.

Suliap aallartinnginnerani ataatsimiititaliat ataavartut kommunalbestyrelsilu suliaq pillugu aalajangiinikuunngillat. Tummeqqiat qanoq akeqarnersut borgmesterip pisortaanerullu ilisimanngikkaat siornatigut aamma allaaserineqarpoq.  

Sermitsiap kommunip inatsit suna tunngavigalugu suliaq nunaminertamik suli pissarsinani aallartissimaneraa akissutissarsiniarlugu suli sulissutigaa.