Naalakkersuisoqarfik borgmesterip Illorsuarnut siunnersuutaanut: Naapertuutinngilaq

Avannaata Kommuniani borgmesterip, Lars Erik Gabrielsenip (S), inoqarfiusimasoq, Illorsuit, ammaqqinneqassasoq kissaatigaa. Taanna Sermitsiamut juunip aqqarngani oqarpoq. Upalungaarsimanermullu atortumik Naalakkersuisunut ilaasortanut siunnersuutigisartakkaminik aamma Sermitsiamut taamani apuussivoq.

 - Qaqqarsuup sisusussap qaavani radiokædeqassooq, qaqqarsuarmi sisusussami kabelit siaarneqassapput, sisuppat kabelit kittorassapput, kittorarpatalu paasineqassooq ajutoortoq, taava alarmi aallartissooq innuttaasullu qimaasariaqarunik qimaassapput. 

Aaqqiissut taanna atorlugu isumaqarpit Illorsuarni najugaqarnissaq illersorneqarsinnaasoq?

- Ilaana. Ilumoortumik ilaanarujussuaq, borgmesteri taamani oqarpoq.

Naalakkersuisoqarfik: Sumiiffimmut tulluartuunngilaq

Atortulersuulli taama ittoq sumiiffimmi pineqartumi naleqqutinngitsoq, Inuussutissarsiornermut Aatsitassanullu Naalakkersuisoqarfik Sermitsiamut akissummini allappoq.

AAMMA ATUARUK:

Illorsuarni najugaqarnissaq illersorneqarsinnaavoq

- Umiammakku Nunaat annertoorujussuuvoq, sisoortussat ataatsimoortukkaat amerlasuujullutik, taakkualu nikikkiartortuaannarlutik aammalu assigiinngitsunik sukkassusilinnik nikikkiartuaarlutik. Ullut tamaasa amerlasooriarluni ujaqqanik sisoortoqartarpoq.

- Taamaattumik sumiiffinni naleqquttuni kabelinik taamaattunik ikkussuinissaq ajornakusoortussaavoq. Periaatsimik taamaattunik ikkussuinermi kalerrisaarut aallartittuaannalertussaavoq, taamaattumillu naapertuuttumik atorsinnaanani, Naalakkersuisoqarfik allappoq.

Borgmesterip isumassarsiatut nassuiaataa, qaqqani annikinnerusunik qajannartortalinni, ataasiakkaani, atorsinnaasartoq, Naalakkersuisoqarfik aamma allappoq. Taamaakkaluartoq taanna Karrat Kangerluanni, Umiammakku Nunaanni, tulluartutut isigineqanngilaq.

Ukiut 50-it

AAMMA ATUARUK:

Naalakkersuisut Illorsuit najornissaat navianartutut isigaat

Umiammakku Nunaanni qaqqat ukiut 50-it ingerlaneranni, qaquguugaluarnersoq, nakkaariaannaasut, Upalungaarsimanermut Ataatsimiititaliarsuaq aarlerinaatinik 2024-imi nalunaarusiornermini inerniliivoq. 

Tamannalu tunngavigalugu Naalakkersuisut Illorsuit najorneqarnissaat ulorianartutut isigigaat, Upalungaarsimanermut Naalakkersuisoq, Iddimanngiiu Jensen Bianco (IA), Inatsisartunut upernaaq manna oqarpoq.

Aatsitassanut Naalakkersuisoqarfiup Sermitsiamut allataa naapertorlugu, Naalakkersuisoqarfimmi qaqqat sisoortarneri pillugit atorfillit immikkut ilisimasallit peqatigalugit aasaq manna kalerrissaarummik misileraaniarput.

Aarlerinaatinik 2024-imi nalunaarusiornermi ilaatigut allaaserineqarpoq Illorsuarni ajornerpaamik pisoqassagaluarpat, tassa Umiammakku Nunaanni qaqqat 200 million kubik meterisut annertutigisut nakkaallutik, taava Illorsuit annertunersaa tassaarsuup malissuinit eqqorneqassasut. Piffissalersuinerit naapertorlugit qaqqat nakkaareerneranni minutsit 11-it 14-illu akornanni qaangiunneranni mallit Illorsuarnut anngutissapput.

Inatsisinik uniuineq periarfissatut isigigaa

Lars Erik Gabrielsenip naliliinera naapertorlugu Illorsuarni attaveqaatit ammaqqippata nunaqarfik najugaqarfigeqqiliinnariaavoq. 

- Attaveqaatit ammaqqiinnarneqartussaapput, akisuumik ammarneqarnavianngillat.S Tusass peqataanianngippat Starlinkeqarpoq, taanna Sermitsiamut juuni 11-ani oqarpoq.

Starlink tassaavoq qaammataasat atorlugit internetimut attaveqaat. Tusassip attaveqaatiginngisaanik atuineq nunatsinni inerteqqutaavoq. Ingerlatseqatigiiffimmi Namminersorlutik Oqartussat pigisaat kisermaassilluni ingerlatsisussaasoq inatsisitigut aalajangerneqarnikuuvoq. Taamaattumik Starlinkimik inoqarfinni atuineq inatsisinik uniuineruvoq.

Tamannalu aamma Attaveqaasersuutinut Naalakkersuisup Sermitsiamut siusinnerusukkut uppernarsarpaa. 

 - Tusass A/S avaqqullugu Starlinkimik atuineq inerteqqutaavoq, Iddimanngiiu Jensen Bianco allappoq.