Nuummi kommunimi peqquserlunnermut suliaq nutaaq aallartippoq
Kommuneqarfik Sermersuumi pisortaasimasoq peqquserlussimasutut, oqartussaaffimmik atornerluisimasutut paasissutissanillu peqquserlussimasutut unnerluutigineqarpoq. Suliap taamaatinneqarnissaa illersuisup aallarniutigaa. Eqqartuussiviulli piumasaa akuerinngilaa.
Eqqartuussisoqarfik Sermersuumi ulluni pingasuni eqqartuussisoqarnissaa pilersaarutaavoq.
Foto: Morten Okkels
Kommuneqarfik Sermersuumi atorfilittaasimasumut eqqarsuussineq Eqqartuussisoqarfik Sermersuumi marlunngornermi ullaakkut aallartippoq.
Pissaanermik atornerluisimasutut, peqquserluttuliortutut paasissutissanillu peqquserluuteqarsimasutut unnerluutigineqarpoq. Pisut sisamat pineqartut unnerluussummi atuarneqarsinnaapput, unnerluutigineqartorlu tamani pisuunnginnerarpoq.
Kommunimi pisortaasimasoq unioqqutitsilluni suliffeqarfiup aalajangersimasup kommunip suliariumannittussarsiornerani ajugaaneranut peqqutaaqataanera unnerluutigineqartut ilagaat. Suliffeqarfik alla 390.000 koruuninik akikinnerusumik neqerooruteqaraluartoq suliffeqarfik taanna suliariumannittussarsiornermi ajugaasimasoq unnerluussummi atuarneqarsinnaavoq.
Pisortaqarfiup akiliissutaa aamma eqqunngitsumik atorsimanera, aningaasartuutinullu matussusiisimanera aamma unnerluutigineqarput.
Ukioq ataaseq pineqaatissinneqarsimasunut inissiisarfimmi
Pineqaatissinneqarsimasunut ukioq ataaseq inissiisarfimmiittussanngortinneqassasoq unnerluussisup piumasaraa.
Københavnip politiivi unnerluussisussaatitaapput, soorluttaaq naalakkersuisut siulittaasuusimasut Lars-Emil Johansen aamma Lars Møller-Sørensen siorna unnerluutigineqarmata taamaattoqartoq. Taakku marluullutik peqquserlussimasutut Nunatta Eqqartuussisuuneqarfiani pinngitsuutinneqarput.
Tamanna pissutigalugu ullumi eqqartuussineq nalinginnaanngitsumik aallartippoq, illersuisup unnerluussisussaatitaasup Danmarkimiinnera Eqqartuussisoqarfik Sermersuumiinnginnissaanut tunngavissaqanngitsoq tikkuarpaa.
Eqqartuussisut marlunngornermi ullaap tungaani apeqqut tamanna suliaraat, aamma eqqartuussinerup aallartinnerani atinik saqqummiusseqqusaannginnerup atorunnaarsinneqarnissaa pillugu Sermitsiap qinnuteqaataa eqqartuussivimmit isummerfiginiarneqarpoq.
Eqqartuussiviup Sermitsiap qinnutigisaa nal. 11.00 missaa akueraa, suliaq tamanit soqutigineqarmat atinik saqqummiusseqqusinnginneq atorunnaarpoq. Eqqartuussinerup ingerlaannarnissaa aamma aalajangerneqarpoq, taamaalilluni illersuisup suliap unitsinneqarnissaanik piumasaqarnera itigartinneqarluni.
