Savissivimmi internetsip pitsaanerulernissaa aallartinnerliortoq: - Attaveeruteqattaarpoq

Qaanaami Savissivimmilu qaammataasat atorlugit internetsikkut attaviit pitsaanerulerlutik sukkatsissasut, EU-p Danmarkip Kalaallit Nunaatalu ataasinngornermi septembarip arfineq-aappaanni isumaqatigiissutigaat. Ullorlu taanna attaviit atuisunut pitsaanerulissasut, Naalakkersuisut Siulittaasuat, Tusassip tusagassiorfinnut nalunaarutaani neriorsuivoq.

AAMMA ATUARUK:

Savissivimmiu EU-p aningaasaliinera pillugu: Neriuppunga internetsi kiisami sukkanerulissasoq

- Nuannaarutigeqaara EU Danmarkillu suleqatiginerisigut, nunatsinni attaviit pitsanngorsarsinnaagatsigit. Ullumikkuminngaanniit innuttaasut Qaanaamiittut aammalu Savissivimmiittut internetitigut attaveqaatinik pitsaanerusunik pissarsisinnaanngussapput, Jens Frederik Nielsen (D) ataasinngornermi septembarip arfineq-aappaanni allappoq.

Tamannali atuisunut killormorluinnaq kinguneqartoq, Savissivimmi innuttaasoq ataasinngornermi oqarpoq.

- Ulloq taanna nalunaarutiginnittoqareersorli attaveeruteqattaarpugut, suli ullumimut taamaappoq. Pitsanngoriartoqanngilaq. Minutsit qulit iluanni ilaatigut marloriarluni attaveerussinnaasarpoq arreeqalunilu, Olennguaq Kristensen Sermitsiamut oqarpoq.

Attaviup pitsaanngitsup Savissivimmi innuttaasut aamma allamik ajornartorsiuteqalersippai. Nunaqarfiup pisiniarfituaani, Pilersuisup pisiniarfiani, ullormut nalunaaquttap akunnerini sisamani ammasartumi, pisiniartilluni kortimik akiliutaasumik akiliisoqarsinnaanngitsoq, aningaasanillu aamma tigusisoqarsinnaanngitsoq, Olennguaq Kristensenip ataasinngornermi aamma oqaluttuaraa. Ajornartorsiut tamanna KNI-p Sermitsiamut uppernarsarpaa.

Tusass: Attaveqaat maanna aaqqippoq

Sermtitsiap Savissivimmi attaveqaatit sooq taama innerat pillugu Tusass ataasinngornermi attaveqarfigaa. Taakkua Savissivimmiut Tusassip atuisunut sullissivianut saaffiginnissuteqarsimanngitsut marlunngornermi ulloqeqqata kingorna ilisimatitsissutigaat. Misissuinermili attaviit ataavartumik ingerlasimannnginnerat paasineqartoq, ingerlatseqatigiiffimmi attaveqatigiinnermut pisortaq, Sermitsiamut allakkatigut akivoq.

AAMMA ATUARUK:

Isumaqatigiissut: Isorliunerusuni internetsi sukkanerulissaaq

- Qaanaami Savissivimmilu OneWeb-imik ikkussinerit nutaajupput taamaattumik atuutilersitsinerup naleqqussaanerullu suli nalaaniippugut. Savissivimmi attaveqaatip kissaatigineqartutut ingerlasimannginnera nalaapparput. Teknikkerivut ingerlaavartumik aaqqiissummik naleqqussaanissamut pitsanngorsaanissamullu sulisimapput, attaveqarnerlu maanna aalaakkaasumik ingerlavoq, Paarnaq Hansen-Zeeb allappoq.

Taassuma Qaanaami attaveqaatit pitsaanerulernerat malugisimaneqartoq, atuisunik apersuinerminni paasisimallugu aamma ilisimatitsissutigaa.

EU-Kommissionenip siulittaasua, Ursula von der Leyen, ministeriuneq, Mette Frederiksen (Soc.) aamma Naalakkersuisut Siulittaasuat, Jens-Frederik Nielsen (D), Qaanaami Savissivimmilu attaveqaatinik pitsanngorsaanissamik isumaqatigiissuteqartuupput.

Isumaqatigiissummi aningaasat katillugit 9 million eurot, tassa 67 millionit koruunit missaat isumaqatigiissutaapput. Taakkunannga 5 millionit eurot EU-mit, 2 millionit eurot Danmarkimit kingulliillu 2 millionit eurot Kalaallit Nunaannit akilerneqassapput.