Siumup Inatsisartuutitai affaannannguinnanngillat - aningaasanittaaq annaasaqarput

Vivian Motzfeldt Kim Kielsenilu Siumumit marlunngormat aninerat partiimut imaannaanngilaq.

AAMMA ATUARUK

Aleqa Vivianip tunuarnera pillugu: Tusaatissatut tiguarput

Siumup Inatsisartunut ilaasortaatitai imaaliallannerinnakkut sisamaniit marluinnanngorput. Affaannanngornerat politikkikkut sunniuteqaannarani aningaasaqarnikkut aamma kinguneqassaaq.

Partiimulli tapiissutit ikilinerat ingerlaannaq malugineqassanngilaq.

Inatsisartut Allattoqarfiani Inatsisilerinermi pisortap Kent Fridbergip oqarnera malillugu, partiinut tapiissutit ukiup qiterpaarnerani aatsaat allannguiffigineqassapput.

- Partiit ilaasortaatitallit tamarmik tunngaviusumik 1 mio. koruuninik ukiumut pisarput, taakkua saniatigut Inatsisartunut ilaasortamut ataatsimut 323.000 koruunit tapiissutigineqartarput, Kent Fridberg nassuiaavoq.

Allannguineq juulimi aatsaat malugineqassaaq

Inatsisartunut ilaasortaq partiimit anigaangat partii tapiissutinik annaasaqartarpoq. Tapiissutit januaarip aallaqqaataani juulillu aallaqqaataani tuunniunneqartarmata Siumup “tapiissutitoqqat”, Inatsisartunut ilaasortanut sisamanoortut, ukiup affaani siullermi tigummiinnassavai.

Pissutsilli juulip aallaqqaataani allanngussapput.

Tapiissutit Siumup Inatsisartuni ilaasortaatitarinikuusaanut marlunnut attuumassutillit partiip annaassavai. Ukiumut katillugit 646.000 koruuninik annaasaqassalluni.

Partii taamaalilluni ataatsimiittarfimmi taasisinnaasunik oqaaseqarsinnaasunillu annaasaqaannarnani tapiissutinik annaasaqassaaq.