Spiralilersuinermi nalunaarusiani immikkut suliaqartut FN-ip isornartorsiorpai

Ilisimatusartut marluk eqimattamit avissaarnerisa kingunerisaanik, spiraalilersuisimanermut atatillugu inuit pisinnaatitaaffii pillugit nalunaarusiat marluk aggustip qaammataani saqqummerput.

Immikkut ilisimasallit eqimattat FN-imeersut, immikkut suliaqartut nalunaarusiat eqqartuussissuserisumit Jonas Christoffersenimit tarninillu pissusaanik ilisimatusartup Jensine Nedergaardimit suliarineqartoq isornartorsiorpaat.

Christoffersenip Nedergaardillu nalunaarusiaminni nakorsaat ataasiakkaat akuersissuteqaratik naartunaveersaatinik ikkussuinermut akisussaanerpaanerarpaat, inuillu pisinnaatitaaffiinik aaqqissuussaasumik unioqqutitsinerunnginnerarlugu.

FN-imi immikkut ilisimasallit nalunaarusiap Danmarkimi kalaallit arnat niviarsiaqqallu tusindilikkuutaat naartunaveersaatinik pinngitsaalillugit ikkussuisimanerannik qulalersitsiniarnera isornartorsiorpaat.

Taama FN tusagassiutitigut nalunaarummi allappoq.

- Danmarkip Kalaallit Nunaatalu naalakkersuisuisa inuit arnat niviarsiaqqallu taama amiilaarnartigisumik iliuuseqarfigineqartut nassuerutigaat, tamanullu utoqqatsersimapput.

AAMMA ATUARUK

Inuiannik nungusaanerua? Naamik, isumalioqatigiissitamit anisut oqarput

- Ajortuliorneq annikillisarneqarniarpat imaluunniit akisussaasoq pinngitsuutinniarneqarpat, tamanna eqqugaasimasup akuerineqarnissaanik ajornakusoornerulersitsisinnaavoq. Akuerineqarnissamik ujartuineq paasissutissat piviusut atorlugit, eqqugaasullu misigisaat aallaavigalugit tamanna suliarineqassaaq, immikkut ilisimasallit oqaatigaat.

Timikkut tarnikkullu piffissami sivisuumi kingunerlutsitsisut

Nalunaarusiami allassimavoq "Danmarkimi Kalaallit Nunaanniluunniit oqartussaasut, nunap nakorsaanera ilanngullugu, misissuinerup nalaani piaaraluni aaqqissuussaasumik akuersissuteqarnani spiralinik ikkunnissamik politikkeqarsimanerat uppernarsarneqarsimanngilaq. Aammattaaq oqartussaasut arlaannaataluunniit innuttaasut amerliartornerannik killiliiniarsimaneranik uppernarsaatissamik tunngavissaqanngilaq.“

FN-ip nunap inoqqaavisa pisinnaatitaaffii pillugit siusinnerusukkut immikkut nalunaarusiortup, FN-ip inuit pisinnaatitaaffii pillugit siunnersuisoqatigiivinut nalunaarusiami uppernarsarpaa arnat akuersitinnagit spiralimik ikkussuiffigineqartut timikkut tarnikkullu piffissami sivisuumik kingunerlutsitsisarsimasut.

- Nunarsuaq tamakkerlugu arnat kinguaassiutitigut peqqissusaat, pisinnaatitaaffiilu nunasiaatillit politikkianni aqutarineqarput, ikinnerussuteqartut amerlanerussuteqartut kulturiannut tulluarsarneqarnissaanik politikkeqarneq, innuttaasullu amerliartunnginnissaanik politikkeqarneq atorneqartarluni. Taama periuseqarneq itisuumik innarliivoq, kinguaariillu arlallit tamatuminnga eqqorneqartarput, immikkut ilisimasallit taama oqarput

Oqartussaasut utoqqatsernerat taarsiissuteqartarnerallu iluarineqarpoq, erseqqissarpaalli ajunaarnersuarmit makititaanissamut nassuerutiginninnissaq aningaasatigullu ataasiaannarluni taarsiissuteqartarneq naammanngitsoq.

Danmarki Kalaallit Nunaallu arnat piumassuserinngisaminnik spiralilerneqarsimasut taarsiissutissanik qinnuteqarsinnaanerannik ammaassipput.

Inuit arnat pingaarnerpaatut inissisimassapput

FN-inimi immikkut ilisimasallit Danmarkip Kalaallit Nunaatalu naalakkersuisui kajumissaarpaat nalunaarusiani allanneqartut tamaasa, ilaatigut pinngitsaaliilluni qitornavissianngortitsisarneq aamma siumut ilisimatitseqqaaratik, akuersititseqqaaratillu, inuit meeraannik angajoqqaavanniit arsaarinnittarnerit, iliuuseqarfigisariaqaraat.

AAMMA ATUARUK

Immikkut ilisimasallit nalunaarutaat: Akuersissuteqarani spiralinik ikkussuineq inuit pisinnaatitaaffiinik unioqqutitsineruvoq

Immikkut ilisimasallit erseqqissarpaat arnat eqqugaasut isumasioqatiginerisigut pitsaaliuinissamut pilersaarusiortoqartariaqartoq, aamma taamatut naalliutsitsisoqaqqinnginnissaa anguniarlugu iliuuseqartoqartariaqartoq.

- Inuit arnat sapiissuseqarnerat pissutigalugu eqqunngitsuliornerit tamakku qaqilerneqarput, immikkut ilisimasallit oqarput. Nangippullu:

- Eqqugaasut ataqqinassusaat, nipaat pisinnaatitaaffiilu sallusuissummik, naapertuilluarnermik, ajorunnaarsitsisumik saammaateqatigiissitsisumillu paasinninnissamut suliniuteqarnermi pingaarnerpaatinneqartariaqarput.

FN-imi immikkut ilisimasallit tassaapput Albert K. Barume – FN-ip nunap inoqqaavisa pisinnaatitaaffii pillugit immikkut nalunaarusiortartoq, Reem Alsalem – FN-ip arnanut niviarsiaqqanullu nakuuserneq pillugu immikkut nalunaarusiortartoq, Ashwini K.P – FN-ip nalitsinni ammip qalipaataa tunngavigalugu immikkoortitsisarneq, allamik nagguilimmik nikaginninneq, nunami allamiunik uumissuinermik tamatumunngalu attuumassuteqartunik akaarinninngitsuliorneq pillugit immikkut nalunaarusiortartoq aamma Claudia Flores (siulittaasoq), Ivana Krstić (siulittaasup tullia), Dorothy Estrada-Tanck, Haina Lu aamma Laura Nyirinkindi – FN-ip arnat niviarsiaqqallu assigiinngisitsinermik ajornartorsiutaat pillugit suleqatigiissitaani ilaasortat.