Kalaallit Nunaat januaarimi sammineqarmat qaammatip naanerani suliassap pingaarutillip naammassineqarnissaa inuit amerlanersaasa utaqqisimagunarpaat.
Spiralilersuisimanermut tunngatillugu inuit pisinnaatitaaffiinut tunngasunik misissuineq Naalakkersuisut 2024-mi aallartitaat januaarip naanerani naammassineqartussatut naatsorsuutigineqarpoq. Nalunaarusialli saqqummiunneqarnissaa maanna kinguartinneqarpoq.
Kalaallit Nunaat januaarimi sammineqarmat qaammatip naanerani suliassap pingaarutillip naammassineqarnissaa inuit amerlanersaasa utaqqisimagunarpaat.
Spiralilersuisimanermut tunngatillugu inuit pisinnaatitaaffiinut tunngasunik misissuineq Naalakkersuisut 2024-mi aallartitaat januaarip naanerani naammassineqartussatut naatsorsuutigineqarpoq. Nalunaarusialli saqqummiunneqarnissaa maanna kinguartinneqarpoq.
Inuussutissarsiornermut, aatsitassanut, nukissiuuteqarnermut, inatsisinik atortitsinermut naligiissitaanermullu naalakkersuisoq Naaja H. Nathanielsen (IA) taama Sermitsiamut ilisimatitsivoq.
- Immikkut ilisimasallit nalunaarusiaat tiguarput, saqqummiutinnginneranili suliarineqaqqaartariaqarpoq. Siullertut immikkut ilisimasallit nalunaarusiaat tuluttut oqaasertaqarpoq, nutserneqassaarlu.
- Taava soorunami nalunaarusiami allanik isummerfigeqqusaqarnersoq misissussavarput, taamaammat minnerpaamik qaammatit marluk qaangiuppata nalunaarusiaq aatsaat tamanut saqqummiussinnaassagipput ilimagaara, taanna oqarpoq.
Nalunaarusiap januaarip 31-ani tuluttut oqaasertaqarluni tunniunneqartussaanera Naalakkersuisut qangali nalunngikkaat taanna nassuiaavoq, kisianni nalunaarusiap januaarimi saqqummiunneqarnissaanut tunngatillugu immaqa paatsuuisoqarsimavoq.
- Aamma Naalakkersuisut ilisimatinneqartussaapput, taakkualu aamma nalunaarusiaq atuartussaavaat, kingornalu nalunaarusiap imaanut tunngatillugu qanoq isumaqarnersugut paasissavara, Naaja H. Nathanielsen oqarpoq.
Suliarujussuarmut ilaasut
Misissuineq kingusinnerpaamik septembarimi 2025-mi naammassineqarumaartoq Naalakkersuisut aallaqqaammut nalunaarutigisimavaat. Spiralilersuisimanermulli tunngatillugu oqaluttuarisaanermi pisimasut attuumassuteqanngitsunit qulaajarneqarneranit nalunaarusiaq septembarip qulingiluaani tiguneqarpoq. Tamannalu soorunami Naalakkersuisut misissuinerannut kinguaattoortitsivoq.
- Taakku (ilisimatuut, aaqq.) naartunaveersaasersuisimanermik suliaq pillugu immikkut ilisimasallit aappaata nalunaarusiaata pingaarutillip utaqqinerani kingusinaarnissartik qinnutigaat, aammattaarlu najoqqutat taakkorpiaat arlallit pisariaqartissimavaat pissarsiarisinnaasimanagilli.
Inuppassuit nalunaarusiaq, inuit pisinnaatitaaffiinut tunngatillugu suliamut tunngasunik aamma pisinnaatitaaffinnik allanik unioqqutinneqarsimasinnaasunik qulaajaasussaq, utaqqigaat Naaja H. Nathanielsenip paasilluarsinnaavaa.
Atuarlugu aallartippaa, imarisaali suli oqaatigisinnaanngilai. Taamaammat tullianik qanoq iliuuseqartoqassanersoq oqaatigiuminaappoq.
- Atuarlugu suli naanngilara, taamaammat tullianik qanoq iliuuseqartoqassanersoq oqaatigiuminaatsippara, naartunaveersaasersuisimanerli pillugu aperiguit tamanna suliamut ilaavoq.
- Oqaluttuarisaanermik misissuineq septembarimi tiguarput. Tamanna suliamut ilassutaavoq. Maanna pisinnaatitaaffiit suliamut attuumassuteqarsinnaasut pillugit paasissutissat amerlanerusut tiguagut. Tamanna suliamut aamma ilanngunneqarpoq,taanna oqarpoq nangillunilu:
- Mette Frederiksen Jens-Frederik Nielsenilu utoqqatsernikuupput, tamannalu suliamut ilaasut pingajoraat.
Kalaallit Nunaanni Danmarkimilu taarsiissuteqarnissamik suliat Naaja H. Nathanielsenip aamma suliami ilaasutut taavai.
- Taamaammat suut tamarmik naammassineqareernerannik oqarneq sivisuumik utaqqisariaqartoq isumaqarpunga. Suliaq suli suliarineqarallassaaq, piffissalli ingerlanerani suut tamarmik qaammarsarneqartut oqaatigisinnaalissallugu anguniagaraarput.
- Peqqinnartumik pisariaqartumillu ingerlasoqartoq isumaqarpunga, naalli ilungersunaraluaraluarluni pisariaqarpoq. Avaqqunneqarsinnaanngilaq. Piffissamik atuiffigineqarnera ikermik mamisaanertut ippoq, Naaja H. Nathanielsen oqarpoq.
Taarsiinissamik suliaq sivitsorneqartoq
Arnat 1992-ip kingorna akuerseqqaaratik spiralilerneqarsimasut naatsorsuutigisaminnit amerlanerusut taarsiiffigitinnissamik qinnuteqarsimasut Naalakkersuisut marlunngornermi tusagassiuutinut nalunaaruteqarput. Taamaammat suliarinninneq sivitsorneqarpoq
Qinnuteqartut qassiunersut Naaja H. Nathanielsenip suli oqaatigisinnaanngilaa. Naalakkersuisut aningaasanut inatsimmi aningaasaliissutaat nakorsaaneqarfiup 2024-mi suliat 15-it ilisimasai tunngavigalugit immikkoortinneqarput.
- Arnat amerlanerusut qinnuteqarnerat suli allanik ilisimanngisatsinnik peqarsimaneranut uannut uppernarsaataavoq. Tamanna ilisimajuarsimassavarput, immaqali aamma paqumisunnerup qaangerneqariartorneranut takussutissaavoq, naalakkersuisoq oqarpoq.
- Taamaammat tamanna aamma arnat taakkua tamarmik namminneq pisuunnginnerminnik paasinninnissaannut uppernarsaataasoq neriuppunga. Eqqortumik pineqarnissamik piumasaqarnissaq ajunngitsuuvoq. Ajortoqarsimaneranik oqaatiginninnissaq ajunngitsuuvoq.
Naaja H. Nathanielsen suliat ilisimaneqartut 15-it sinnerlugit qinnuteqartoqassagaluarpat Inatsisartunut immikkut aningaasaliissuteqarnissamik qinnuteqartussaalluni siusinnerusukkut nassuiaateqarpoq. Suliarlu maanna aallartippaa.
