Aningaaseriviinnaanngitsoq: Qeqertarsuup Tunuani immikkoortortaqarfinni aqutsisut inuiaqatigiinnik sullissilluarput

Ilulissani immikkoortortaqarfimmi pisortaq Ane nalunnginneqarluartuuvoq. Umiatsiaararsorlutik aalisartunut siunnersuisarneraniit imaluunniit illoqarfimmi naapinneqartarneraniillu. Uini Iluliarmiu Sisimiuniit 2013-imi nooqatigaa, Grønlandsbankenilu 2014-imi atuisunut ikiortissarsiormat qinnuteqarluni.

Imminut tulluarluinnartoq paasivaa. Anep ineriartortuarneq inunnguuseraa, taamaaliunngikkaangamilu uninngaveerulluni eqqissiveeruttartuuvoq. Taamaattumik ukiuni aqqaneq-marlunni aningaaserivimmi sulinermini ukiut tallimat aningaasaqarnermut tunngasunik ilinniagaqarpoq, maannalu pisortatut ilinniaqqilluni. Pisortanngortigani siunnersuisartutulluunniit sulisunngortinnani sullitat inuttut naligalugit naapinneqartarnissaat Anep pingaartitaraa – unneqqarilluni naleqartitanillu pingaarutilinnik tunaartaqarluni.

Inuit iliuuseqarluarsinnaalluarnerannik upperinninneq naleqarnerulersitsisoq

Anep illoqarfimmi innuttaasunut allannguisinnaaneq ulluinnarni sulinermini piumassusininnaraa. Angutip namminersortup, illoqarfimmi najugaqartup, ukioqqortuunngoraluarluni takorluugaata piviusunngortinnissaanut aningaaserivimmiit tapersersorneqarneratigut tamanna timitalerneqarpoq. Angutip soraarninngornissaa qalligaluarpoq, Anelli aningaaseriviullu nalunngilluareerpaat. Angut timimigut suli peqqissuulluni eqqarsartaatsimigut eqeersimaartuuvoq, illoqarfimmilu ilisarisimasaqarluarami iliuuseqarsinnaalluartuuvoq.

Taamaalilluni takorluukkani piviusunngortissinnaalerlugulu inuiaqatigiinnut tunniussassaqarnerulerpoq. Aningaaserivimmiit periarfissat takuneqarsinnaallutik, inunnik nalunngisaqarneq aallaavigalugu aalajangiisoqartarnera atuisunut naleqartitsinerulertarpoq.

Inuiaqatigiinni akisussaassuseqarneq aningaaseriviup ammanerata nalaani taamaallaat pineq ajorpoq. Ane sunngiffimmini nammineq kajumissutsiminik Røde Korsimi, peqatigiiffilerinermi Sapiimmilu suleqataasarpoq, taakkulu aqqutigalugit meeqqat imminnut tatiginerat annertusaaqataaffigalugulu nuannaartitsisarpoq. Anemummi kajumissutsimik sulineq naleqartuuvoq, imminut ilinniaatigaluni allanut tunniusseqissinnaasarami.

Immikkoortortaqarfimmi pisortaq imaani angalanikkut, ilaquttanilu asimukarnikkut kalaaliminertornikkullu nukissaminik aallertarpoq. Puisi siaasagaq, tuttu suaasat kuannimillu marmeladeliaq nutaaq mamarsaatigisarlugu.

AAMMA ATUARUK

Najukkami qanilaarnerup tunniusimanerullu Nunarput naleqarnerulersippaa

Ineriartorneq Aasiaat siunissaraa

Aasianni immikkoortortaqarfimmi pisortaq Nivi Nielsen-Zeeb naapitassaavoq. Illoqarfimmi peroriartornikuugami nunaqqatini ilisarisimalluarpai. Nivi Grønlansbankenimi sulilinngikkallarami, piginnaasatigut unammilligassanik amigaateqarami arlalinnik ataatsikkut suliffeqartarnikuuvoq.

Unammilligassat ujartukkani aningaaserivimmi nassaarai. Atuisunut ikiortitut atorfineqqaarnerminiit qaffakkiartorusaarluni aningaasaqarneq pillugu ilinniagaqalerpoq, kingornalu immikkoortoqarfimmi pisortanngorluni. Aningaaseriviup immikkoortortaqarfinni pisortanik ilinniartitsisarnissaq anguniagarimmagu atorfini tulluusimaarutigaa, aningaaserivimmilu pisortatut ineriartorneq illoqarfimmi innuttaasut ilisarisimalluarnerannut iluaqutigaa.

Nivip illoqarfiup inuussutissarsiortullu ineriartortinnissaat uummateqarfigaa. Taamaammat Sulisitsisut (GE) illoqarfimmi immikkoortortaqarfiani siulersuisuni ilaasortaavoq, tassani illoqarfimmi suliffeqarfiit takorluugaat siunissamullu pilersaarutaat malinnaaffigisarlugit. Taamatut ilisimasaqarnera aningaaserivimmiit illoqarfimmi ineriartortitsinissamut tapersersuisoqarsinnaaneranut iluaqutaavoq, atuisullu pitsaasumik avitseqatigineqartarlutik.

Grønlandsbankenimiit ulluinnarni nuimasuunissaq anguniagaavoq, aamma immikkoortortaqarfinni sulisut illoqarfimmi akuullutillu peqatigiiffiit aqqutigalugit allanngueqataanissamik suleqataallutik.

Illoqarfimmi mikisumi najugaqartilluni sullitat suliffiup avataani naapinnissaat avaqqunneqarsinnaanngilaq, assigiinngitsuni aaqqissuussani kaffillernernilu naapinneqartaraluartut Nivip immikkoortortaqarfimmi pisortaanera namminerlu inuunera nunaqqataasaa immikkoortissinnaalluarpaat.

Illoqarfeeraq qimalaarusukkaangamiuk arpaasileriarluni mittarfiup tungaanut arpattarpoq. Tassani nipaatsuuvoq imaanullu isikkivik isiginnaarujoorlugu aasaanera malugineqarsinnaalluarluni.

Anep Nivillu aningaaserivik sinnerlugu sulisuinnaanatik, ulluinnarni inuiaqatigiinni akuullutik sulisarnertik assigiiffigaat. Inuit, periarfissat unammilligassallu nammineq aqqusaartaramikkit ilisimasaqarfigaat. Taamatut ilisimasaqarnerat ulluinnarni allannguinissamut, sullitallu qanimut naapittarnerannut pitsaasumik siunnersuinissamik qulakkeerinnittuuvoq – Kalaallit Nunaannut tamarmut iluaqutaasumik takorluugaqarneq eqqorlugu.

Allaaserisaq Grønlandsbankenimit aningaasaliiffigineqarpoq.