Borgmesteri tyskit erfalasumik amusiniarnerannut: Ajoqusiisinnaavoq
Quiasaarisartoq tyskeq Amerikamiut erfalasuannik Nuummi amusiniarnera quiasaarutaannaanngilaq ajoqusiisinnaanngitsoq, borgmesteri Avaaraq Olsen oqarpoq.
- Illoqarfiit pingaarnersaanni kulturikkut illorsuatta erfalasulersiani amusineq — sakkutuut pissaanilissuit sapaatip-akunnerini arlalinni nunatsinnut sakkutooqarnikkut saassussiniarlutik oqariartuuteqartut erfalasua — quiasaarnerunngilaq. Quiananngilaq. Akornusiisinnaavoq, Kommuneqarfik Sermersuumi borgmesteri Avaaraq Olsen oqarpoq.
Assi: Oscar Scott Carl
Tyskip quiasaarisartup Nuummi Katuap saavani Amerikamiut erfalasuat pingasunngormat amoriaraluarpaa.
Quiassuaataannaanngilaq ajoqusiisinnaanngitsoq, Kommuneqarfik Sermersuumi borgmesteri Avaaraq Olsen tusagassiortunut nunanit allaneersunut tuluttut nalunaaruteqarpoq.
- Tikeraat kikkut tamarmik orniguffigisinnaasaannik aalassaataasinnaasumik pissusilersortut takoqqammerpavut, politikkikkut takussutissat tupaallaatigineqarsinnaasut allallu sorsunneq, nakuuserneq nunanillu tiguaanerit pillugit meeqqanut apersuisut. Taamaaliorneq quiassuarnerunngilaq. Isumalimmik tusagassirnerunngilaq. Inuiaqatigiinnut eqqarsartaatsikkut ilungersortitaareersunut naakkittaatsumik pissusilersorneruvoq, oqarpoq.
USA-mit pisut innuttaasunut amerlasuunnut isumakulutsitsillutillu ersissutaasut aamma tikkuarpaa. llaqutariit annilaangapput, sinnarlupput toqqissisimanngittuarlutillu, allappoq.
- Ernummatit tamakkua takuneqarnissaq, isiginnaarneqarnerunissaq illarnartunillu takusassiiniarnermut ajornerulersinnerat sapiitsuliornerunanilu nutaaliornerunngilaq. Innuttaasunut toqqissisimanngereersunut nanertuineruliinnarpoq.
Iliuuseqartigasi eqqarsaqqaaritsi
Erfalasup amuneqariaraluarnera eqqartorpaa.
- Illoqarfiit pingaarnersaanni kulturikkut illorsuatta erfalasulersiani amusineq — sakkutuut pissaanilissuit sapaatip-akunnerini arlalinni nunatsinnut sakkutooqarnikkut saassussiniarlutik oqariartuuteqartut erfalasua — quiasaarnerunngilaq. Quiananngilaq. Akornusiisinnaavoq.
- Maani tikeraajuvusi. Akisussaaffimmik tamanna nassataqarpoq. Quiagisat pillugit kulturikkut assigiinngissusaat inunnik ersilersitsillutillu misigissusaannik pimoorussinnginneq utoqqatsissutaanngillat. Iliuuseqarniaraluarneq kingunerisassaanniit pingaaruteqarnerunngilaq, oqarpoq.
Tusagassiorfiit "quianarsinnaasunik" immiussitinnatik eqqarsarluaqqaartarnissaat borgmesterip kaammattuutigaa.
- Tikeraat ataqqinnittut tusagassiortullu akisussaassuseqartut tikilluaqquagut, inuiaqatigiinnulli ajoqutaasumik iliuuseqartoqarnissaa akuerinngilarput.
