Borgmesteri avissaarusuttorpassuit pillugit: Uggornarpoq, tupaallanngilangali   

94,56 procentit.

Tassa Nanortalimmi nunaqarfittaanilu taaseqataasuni taama amerlatigisut Kommune Kujallermit anerusupput namminerlu kommuninngorusullutik.

- Taasinerup inernera ataqqivara aamma tupaallaatigivallaanngilara. Qangarsuarli kissaataareermat aamma politikkikkut qineqqusaarutaallunilu oqallisaaqimmat tupigivallaanngilara taama inerneqarmat, Kommune Kujallermi borgmesteri Malene Vahl Rasmussen taasinerup inerneranut taama qisuariaateqarpoq.

Naak tupaallanngikkaluarluni ugguarpoq. 

- Soorunami uggorivara killiffipput, kisianni siulimma suliai taakkua allanngortissinnaanngilakka, qanutut pingaarnersiuisimanersut taakkua allanngortissinnaanngilakka, qanoq ersarinngitsiginersut aamma taanna allanngortissinnaanngilara. Taamaammat akisussaaffik massakkut uannut tunniunneqarnikoq sapinngisara tamaat naammassiniarsarissavara.

Suliaq iperartussanngorpaat

Taasititsineq piareermat inerneri nassiunneqartussanngorput. 

- Massakkut suliaq uagutsinninngaanniit iperarparput. Taasititsivugut, inernera Nunamut Namminermut Naalakkersuisoqarfimmut ingerlateqqissavarput, taava taakkua suliaq nangissavaat, Malene Vahl Rasmussen oqarpoq.

Nunatsinni kommunit aggulunneqarnerat pillugu aaqqissuussinermut ataatsimiititaliap kommunini pisortanut Nunamullu Namminermut Naalakkersuisoqarfimmit inuttaqartup inernerit aamma tigussavai. 

Ataatsimiititaliaq taanna ukioq manna naalerpat suliaminik naammassisaqartussaavoq. Taasineruttaaq inerneri Naalakkersuisut Inatsisartullu kommunit qanoq ilusilerneqarnissaat oqallisigilerunikku tunngavissatut atortussaavaat.

Nanortalik immikkut kommuninngussagaluarpat sukumiisumik misissuisoqarnikuunngilaq, matumani aamma aningaasatigut kingunissai qanoq issanersut ilisimaneqarani. 

Qanimut oqartussaaqataarusuttut

AAMMA ATUARUK 

Kujallermi taasititsineq: Amerlanerussuteqartut kommunimit avissaarusuttut

Kommunerujussuit 2009-mi atuutilermatali illoqarfiit nunallu immikkoortui arlallit avissaarusullutik kissaateqartareerput. Kommuni ataaseq maannamut avinneqareernikuuvoq. Qaasuitsummi Kommunia avillugu Avannaata Kommunianngortinneqarlunilu Kommune Qeqertalinngorami.

Nunatsinni kommunit qanoq aggulunneqarnissaat pillugit aappaagumiit 2029-p tungaanut piareersartoqassaaq, kommunillu nutaamik 2029-mi aggulunneqarnerat atuutilertussaalluni.

Innuttaasut qanimut oqartussaaqataarusunnerat immikkut kommuninngorusunnermut tunngavilersuutigineqakkajuttarpoq. Soorlu aamma Nanortalimmi innuttaasut ilaat taama tunngavilersuuteqarluni kommunip avinnissaanut kissaateqartoq tallimanngormat oqaloqatigigipput.  

Qinikkat borgmesterillu illoqarfimmi takussaavallaanngittarnerat aamma tunngavilersuutaanut ilaavoq.

- Taanna ilisarisinnaanngilara, ukiuni kingullerni imaassinnaasoq ersarinngippallaarsimasut. Uanga ersarinnikooqaanga, sapinngisara tamaat malinnaaniarsarisarpunga. Kisianni tallimanik qinigaatitaqarput, taamaammat qinikkanik naapitsisinnaannginneq ilisarisinnaanngilara, Malene Vahl Rasmussen oqarpoq.