Ataasiinnarmik saaffiginniffissaqarnissamik periuseq iluatsinngitsoorsimasoq illoqarfiit pingaarnersaanni pisortat nassuerutigaat.
Kommuni aaqqissuusseqqittoqarnissaanik inuit innarluutillit innuttaasullu immikkut pisariaqartitsisut inatsisit naapertorlugit ikiorneqarnissaannut isumagineqarnissaatalu qulakkeernissaanik siunertaqartumik maanna suliniuteqarpoq.
Ataasiinnarmik saaffiginniffissaqarnissamik periuseq iluatsinngitsoorsimasoq illoqarfiit pingaarnersaanni pisortat nassuerutigaat.
Kommuni aaqqissuusseqqittoqarnissaanik inuit innarluutillit innuttaasullu immikkut pisariaqartitsisut inatsisit naapertorlugit ikiorneqarnissaannut isumagineqarnissaatalu qulakkeernissaanik siunertaqartumik maanna suliniuteqarpoq.
Tamanna Sermitsiap Meeqqanut Ilaqutariinnullu Ingerlatsivimmit allakkiaq tunngavigalugu sapaatip-akunnerani kingullermi saqqummiuppaa. Allakkiaq innarluutillit kattuffiannit NIIK-mit allanneqarpoq, tassanilu nunatsinni kommunini annerni innarluutilinnut suliniutit iluatsinngitsoornerat isornartorsiorneqangaatsiarpoq.
NIIK-ip, Kalaallit Nunaanni Inuit Innarluutillit Kattuffiata, periuseq "ataasiinnarmik saaffissaqarneq" "saaffissaqannginermik" taavaa.
Tusarnaarneqanngitsut
Taamaammat suliat inatsisinik unioqqutitsilluni itigartinneqarsimammata sooq tusarnaartoqarsimannginnersoq minnerunngitsumillu suliap isornartorsiorneqarsinnaasup ingerlanerani siusinnerusukkut iliuuseqartoqarsimannginnersoq kattuffiup paasisinnaanngilaa.
- Kommunalbestyrelsip Inunnut inuunerminni ajornartorsiuteqareersunut akisussaaffini tigusariaqarpaa – soorlu suliamik suliarinninneq kukkusoq erseqqissumik iluarsiniarlugu taama sivisutigisumik ingerlasimanersoq – paasiniartariaqarlugulu tamanut nalunaarutigisariaqarpaa, NIIK-mi siulittaasoq Viggo Johansen allappoq.
Kommunalbestyrelsip pisortaqarfiillu inuit innarluutillit taakkualu ilaqutaasa atugaat paasilluanngikkaat NIIK isumaqarpoq.
- Kommunit ataasiinnarmik saaffissaqarnissamik periaasiata iluatsinnginnera kisimi pissutaanngilaq. Suliassaqarfiit tamarmik saaffissaqannginnerannik pissuteqarpoq. Suliat NIIK-ip suliarisartagai amerlanerpaartaat iliuuseqarfigineqarsinnaanngilluinnarput, nipangersimaffigineqartarlutik pissutsillu allanngortinniarneqanngillat. Ukiut qulikkuutaat ingerlaneranni innuttaasunut atugarliornerpaanut atugassarititaasut aaqqiissutissaqanngitsutut ajornerulertarput. Namminersorlutik Oqartussat kommunillu, ingerlatsiviit immikkoortortallu akornanni suleqatigiinneq piviusoq, ilisimasaqarneq iliuuseqarnerlu amigaataavoq, NIIK erseqqissaavoq.
Attaveqatigiinneq amigaataasoq
Sooq kommunimi 23.000-iinnarnik innuttalimmi "suliniut atorluarsinnaasoq nassaarineqarsinnaanngitsoq, imaluunniit sooq kikkut tamarmik tusarnaarsinnaanngikkaat pissutsit allanngortinniarlugit iliuuseqarnerminni suut akornutigisarneraat" Peqatigiiffiup paasiuminaatsippaa.
NIIK naapertorlugu kukkunerit isornartorsiorneqartariaqartut amerlaqaat:
- Siunnersuinermi neqeroorutit amigaataapput
- Najugaqarfinnik naleqquttunik pisinnaasalinnik sulisoqartunik neqeroorutit amigaataapput
- Sulisut ilinniarsiasut qulakkeerniarlugit pimoorussilluni suliniuteqartoqanngilaq
- Inuit innarluutillit atuarfinni, suliffinni, sunngiffimmilu sammisassaqarfinni tamanut ammasuni peqataatinneqarnissaat pillugu pimoorussassamik suliniuteqartoqanngilaq
Aaqqissuussaanerit kukkusuunngitsut, inuiili kukkussuteqartut, aamma kommunaldirektøri kommunalbestyrelsilu akisussaasut NIIK-p erseqqissarpaa.
Inuit siulliullugit
- Kommunini sulisut sullissisullu inuit siulliullugit isumagineqartussanngorlugit, qanorluunniillu pingaarnersiuisoqaraluarpat atortorissaarutit ajortut tulliutissallugit, siunissami aaqqissuussisoqartariaqarpoq. Tamannalu aqutsisunit tapersersorneqartariaqarpoq. Pingaartumik atortorissaarutinut nutaanut nuunnermi, NIIK-imi siulittaasoq Viggo Johansen sakkortuumik isornartorsiuivoq.
