Kiisami: Atuarfik Inussuk qaammat tulleq ammassaaq

Nuup illoqarfiatigoorluni sanaartugarujussuaq sivisuumik atorneqarsimanngitsoq kiisami inuaqisussanngorpoq. Atuarfiup Inussuup silataa ukiut marluk sinnerlugit qaangiummata piareernikuugami qisuttaasa ilai qarsulaalereersimapput.

Ammarneqarnissaanullu pilersaarutit attanneqartut Kommuneqarfik Sermersuumit maanna uppernarsarpaat. Atuartut 910-t ukioq atuarfiusumi nutaami, aggustip 17-iani atuariartorunik avatangiiserilikkaminnut alutorsarnissaat taamaammat qularnanngilaq. Sulisulli 126-t siulliullutik atuarfissuarmut aggustip pingajuani suliartorunik isissapput. 

- Atuarfik atuartunut sulisunullu atuarnissamut, ilinniartitsinissamut suleqatigiinnissamullu pitsaasunik nutaaliaasunillu sinaakkutissiissaaq, Kommuneqarfik Sermersuumi Meeqqanut Atuarfeqarnermut Ingerlatsivimmi pisortaq Tina Evaldsen oqarpoq. 

Atuartut naammagittartariaqartut

Inussuup ammarneqarnissaata utaqqinerani Nuummi atuarfiit marluk USK ASK-ilu oqoqartut paasineqarmata atuartut illoqarfimmi sumi tamani siornali atuartinneqartariaqarnikuupput. Taamaammat atuarfissaarsuaq utaqqineqarsimaqaaq.

- Nalunngilarput amerlasuunit, uagullumi aamma, atuarfiup ammarnissaa utaqqineqartoq qilanaarineqartorlu, taamaattumillu piffissaq nalliuppat tikilluaqqusinissatsinnut qilanaarpugut, Tina Evaldsen oqarpoq. 

AAMMA ATUARUK

Nuuk: Atuarfiup naammassinissaata kinguaattoornera meeraaqqerivimmiittunut eqquissaaq

Atuarfik ikuallattoqassagaluarpat isumannaallisaanikkut akuerineqanngimmat ammarniaasaarnikuuvoq. Sanaartortulli Ístakimeersut tissaluttaatinik ikkussuissasut kommunimit isumaqatigiissutigineqareersorlu atuarfik ammarsinnaalerpoq. Pilersaarutilli siornatigutulli allanngussagaluarpata angajoqqaat ilisimatinneqarumaarput. 

- Qaammatikkaartumik angajoqqaanut paasissutissanik nassiussisarpugut, tassani angajoqqaat sulisullu suliap sumut killinneranik malinnaatittarlutigit. Taamaattumik pilersaarutit allannguuteqassagaluarpata tamanna ingerlaannaq paasissutissiissutigissavarput, Tina Evaldsen oqarpoq. 

Atuarfiup sanaartornera 633.739.112 koruuneqassasoq siorna oqaluttuaraarput. Ístakikkullu tissaluttaatinik ikkussuinissaat isumaqatigiissutigineqarmat kommunalbestyrelsip 2022-mi atuarfiliornissamut meeqqeriviliornissamullu katillugit 750 millionit koruuninik aningaasaliissuteqarnerata iluani naammassineqarsinnaasoq naatsorsuutigineqarpoq.