Upernaakkut ataatsimiinneq naammassivoq: Matumani ataatsimut isigalugu paasisaqarfigiuk

Upernaakkut ataatsimiinneq ulluni 66-ini ingerlareersoq Inatsisartut oqaluttarfiannit oqaaseq kingulleq sisamanngormat oqaatigineqarpoq.

Oqaluuserisassat 147-pput, ataatsimiinnerlu allaat ullunik marlunnik sivitsorneqarpoq.

Politikerilli suut aalajangerpaat? Suullu oqaloqatigiissutiginngitsoorpaat? Suullu oqaluuserisassanngortissimasatik peqqissimissutigaat?

Ataatsimiinnermi matumani oqaluuserineqartut pingaarnersat ilaat paasisaqarfigikkit.

Soraarnerussutisiaqalernissamut katersisussaatitaaneq

Immikkoortut marluk soraarnerussutisiaqalernissamut katersisussaatitaanermik aaqqissuussinermut, Naalakkersuisut naalakkersuisooqatigiinnissamut isumaqatigiissummi misissorniarlugu neriorsuutigisaannut, tunngapput.

Aamma atuaruk

Pisortatigoortumik pinngitsoorani soraarnerussutisiaqalernissamut aaqqissuussap allanngortinneqarnissaanik suliaq aallartinneqartoq

Aaqqissuussaq atorunnaarsinneqartariaqartoq Naleqqap siunnersuutigaa, ilaasortalli 16-it itigartitsimmata siunnersuut itigartinneqarpoq.

Ileqqaagaqarnissamut pisussaaffiup 9 procentinut killilerneqarallarnissaa, akileraarutinut uppernarsaatitigut qaffaanikkut ilanngaatiginnittarnerup atorunnaarsinneqarnissaa imaluunniit akileraarutinut allagartat qaffanneqarnissaat aamma atorfilinnut maleruagassat allanngortinneqarnissaat Naalakkersuisut siunnersuutigaat. Tamanna 16-inik akuersillluni taasisoqarneratigut akuerineqarpoq.

Naalakkersuisut soraarnerussutisiaqalernissamut aaqqissuussinerit tamaasa, ilaatigut utoqqalinersiutit, atorfilittatut soraarnerussutisiat aamma pinngitsoorani soraarnerussutisiaqalernissamut aaqqissuussinerit pillugit malittarisassat, misissorniarlugit immikkut ilisimasalinnik suleqatigiissitaliortoqassasoq aamma aalajangerput.

Sakkut pillugit inatsit

Sakkut pillugit inatsitoqaq ukiut 30-t sinnerlugit pisoqaassuseqarmat arlaleriarluni kaammattuutigineqareersoq Inatsisartut kiisami sakkunut inatsisip 1992-imiilli nutarterneqarnerata annersaa akuersissutigaat.

Siunissami aallaaseqarsinnaaneq atuisinnaanerlu 15-inik ukioqalernermiit atuutilertussanngorpoq. Meeqqalli aqqaneq-marlunnik ukiullit inersimasoq akisussaaffilik peqatigalugu piniarnermi sakkunik atuinissaat periarfissaalerpoq.

Aammattaaq sakkut imassallu qanoq toqqorneqartarnissaannut piumasaqaatit sukannernerulersinneqarput.

187-it akuersillutik taasisut arfineq-marluk taasinngillat. Sakkut pillugit oqartussaaffik nunatsinnut suli utertinneqarnikuunngimmat inatsit Inatsisartuni akuerineqaraluarluni Folketingimi saqqummiunneqaqqaartariaqarlunilu akuersissutigineqartussaavoq.

Tuluit oqaasii allamiut oqaasiitut ilinniarneqartutut siullertut

Tuluttut oqalunneq meeqqat atuarfianni atugaasariaqarlunilu taamaalilluni qallunaatut oqaluttoqarpallaarunnaassaaq. Inatsisartut tamanna isumaqatigiissutigaat.

Tuluttut oqaatsit takornartat oqaasiini siullersatut atulersinneqartalissasut danskillu oqaasii atorunnaariartuaarneqalissasut Jens NapãtôK’ (N) siunnersuuteqarpoq. Naalakkersuisut allannguutissatut siunnersuummik saqqummiussipput, tassani Naalakkersuisut kalaallit oqaasiisa inissisimanerat atugaanerallu nukittorsarneqarnissaat attatiinnarnissaallu siunertaralugu iliuusissatut pilersaarusiussasut meeqqat atuarfianni kalaallisut tuluttullu ilinniartitsineq nukittorsarniarniarlugu peqquneqarput.

21-nit taasisoqarluni isumaqatigiissutigineqarluni akuerineqarpoq.

Naleqqamit siunnersuutigisatik iliuusissatut pilersaarummut ilanngunneqassasut isumaqaramik allannguutaasinnaasut siunnersuutigineqartut akueraat.

Piffissamik aalajangiisinnaaneq

Aamma atuaruk

Akerliusut naalakkersuisooqatigiit aalajangiuminaatsuunerat isornartorsiorpaat

Oqaluuserisassalli tamaasa politikerit ataatsimiinnermi matumani angumerisinnaanngilaat. Oqaluuserisassat ilaat arlaleriarlutik kinguartinneqartartoq tassaavoq Kalaallit Nunaanni nalunaaquttamut qanga atuuttumut uternissaq.

Naleqqap Siumullu piffissamik aalajangersaanermut siunnersuutaat marluk ukiaq kingulleq siullermeerneqarput. Arlaleriarluni kinguartinneqartareerluni aappassaaneerneqarnera upernaakkut ataatsimiinnermi kiisami aallartippoq, sivitsunngitsorli unitsinneqarlunilu Inatsisinik Atuutsitsinermut Ataatsimiititaliamut utertinneqarpoq.

Taamaammat oqaluuserisassat ukiaru oqaluuserineqaqqissapput - neriuppugullu tamatuma kingorna pingajussaaneerneqarlutillu suliarineqarnerat naammassineqassasoq.

Piffissaq UTC-2 atortuinnarneqassasoq, aasaaneranili nalunaaqutaq kingusinnerpaamik 2028-mi januaarimi atorunnaarsinneqassasoq Inatsisit pillugit Ataatsimiititaliap inassutigaat. Tamanna Naalakkersuisunit tapersersorneqarpoq. Inatsisit pillugit ataatsimiititaliaq aappassaaneerisoqannginnerani isummaminik allannguissanersoq piffisap takutikkumaarpaa.

Inuit nalunaarsorneqarnerat

Naleqqap siulittaasuata Pele Brobergip EMRIP-p inassuteqaatai tunngavigalugit Naalakkersuisut Kalaallit Nunaanni nunat inoqqaavisa “Inuit” nalunaarsorneqarnissaannik peqquniarpai.

Inatsisartunili tapersersorneqanngilaq. Tamanna pissutigalugu siunnersuut taamaatsillugu ataatsimiititaliamit suliarineqanngitsoq aappassaaneertussanngorlugu ingerlateqqinneqarpoq, Naalakkersuisullu siunnersuutip itigartinneqarnissaa siunnersuutigaat.

2026-mi ukiakkut ataatsimiinnermi aappassaaneerneqaqqaarnissaa Pilersaarutigineqartuaannarsimavoq.

Cannabisip inerteqqutaajunnaarsinnissaa

Aamma atuaruk

Cannabis pinerluttulerinermi inatsimmit peerneqassava?

Naalakkersuisut 2026-mi ukiakkut ataatsimiinnerup naannginnerani cannabisip inerteqqutaajunnaarnissaanik suliniuteqalerlutillu pilersaarusiussasut Atassutip siulittaasua Aqqalu C. Jerimiassen siunnersuuteqarpoq.

Inatsisartunili partiinit allanit tapersersorneqanngilaq.

Taamaammat Aqqalu C. Jerimiassen siunnersuutini tunuartillugu aalajangerpoq.

Sikuki Nuuk Harbour

Kalaallit Nunaanni umiarsualiviit Sikuki Nuuk Harbouritut siunissami niuerfiulissappat?

Naalakkersuisut taama siunnersuuteqarput. Tamanna 2025-mi ukiakkut ataatsimiinnermi ukioq mannalu upernaakkut ataatsimiinnermi oqaluuserisassanut ilaavoq.

Taamatulli eqqarsarneq silatusaarnerunersoq aalajangersinnaanngilaat.

Oqaluuserisassaq ukiakkut ataatsimiinnermi matumanilu oqaluuserisassanit peerneqarsimavoq. Oqaluuserisassarli Apriilip 30-ani siullermeerneqarpoq. Oqaluuserisap ataatsimiititaliamut ingerlateqqinneqarnissaa tapersersorneqaraluarpoq.